Nakorsat siulittaasuat: Sulisunik amigaateqarneq kukkunissamut qaninnerulersitsisoq

Nakorsat peqatigiiffiani siulittaasup Hans Christian Florian Sørensenip peqqinnissaqarfimmi sulisunik amigaateqarnerup nakorsianut kinguneqartitsinissaa ernumassutigaa.

Peqqinnissaqarfimmi sulisut tuaviinnaq sulimmata nakorsiat eqqorneqarsinnaasut, nakorsat peqatigiiffianni siulittaasoq, Hans Christian Florian Sørensen, taama naliliivoq.

AG taama allaaserisaqarpoq.

Hans Christian Florian Sørensen ulluinnarni immikkoortoqarfimmi Tasiilami nakorsatut sulivoq. Ulluinnarni sulinerminit sulisut pisariaqartillugu immikkut ittumik ikiuunnissaminnut piareerimasartut nalunngilaa. Kisianni killeqarpoq.

- Sulisussanik amigaateqartoqartillugu sulisut ilungersornerusarput. Piffissap ilaani immaqa ingasappallaalersinnaavoq taava kukkunissamut qaninnerulersarpoq. Aamma sunniuteqanngitsoorsinnaanngilaq Dronning Ingridip peqqissaaviani maanna napparsimasunik tigooraaneq unikaallatsinneqartariaqarmat. Nappaatinik paasiniaaneq katsorsaanerlu kinguaattoortarput, aamma piffissaq peqqissutsimut nappaatinullu tunngasoq pingaartuuvoq. Ajornerpaamik pisoqassappat tamatuma kingunerisinnaavaa napparsimasoq ajorseriarluni, nappaataalu ilakutaqalerluni, Hans Christian Florian Sørensen oqarpoq.

Ukioq manna Sanami nakorsiat siniffiinik aasaanerani matusisariaqarnikuuvoq, peqqissaasunik amigaateqartoqarmat.

Pisunik Hans Christian Florian Sørensenip nalilersuinera AG-mi paasisaqarfigiup, tassani aamma Naalakkersuisut peqqinnissaqarfimmik sallititseqqullugu kajumissaarpai:

Powered by Labrador CMS