Nakorsat pisortaat: Atugassarititaasut pillugit siunnerfeerunneq soraarniuteqarnermut pissutaaqataapput

Peqqinnissaqarfimmi ukiut tallimaat avillugu nakorsat pisortaattut atorfeqarpoq.

Maannakkulli Berit Bjerre Handbergip atorfik qimallugu Aalborg Universitetshospitalimi Danmarkimi pisortap tulliatut 15. marts atorfinissaaq.

- Tamanna qilanaarisorujussuuara, Sermitsiaq.AG-mut taanna allappoq.

Nakorsat pisortaat killissaleriikkamik 1. oktobarimi 2018-imi 2022-mi 1. oktobari ilanngullugu atorfeqarpoq. Isumaqatigiissut ukiunik sisamanik sivitsussallugu Peqqinnissaqarfik peqatigalugu upernaaq isumaqatigiissuteqarput.

Sinaakkutit ilungersunartut

Berit Bjerre Handberg qaammatit pingasut qaangiuttut soraarniuteqarniarluni aalajangerpoq.

- Aningaasaqarnermut Siunnersuisoqatigiit 2019-imi nalunaarusiaa atuaraanni, ersarissumik allaqqavoq: tassa peqqinnissaqarfimmut naatsorsuutit qaffasissorujussuupput, nukissallu tatineqaqalutik atugassarititaasut ajornakusoortut. Siunnerfeerunnarpoq, tamannalu nutaamik suliffissarsiorninnut pissutaaqataavoq.

Nunatsinni Peqqinnissaqarfimmi nakorsat pisortaattut atorfeqarsimanini nuannarisimallugu, Berit Bjerre Handberg oqarpoq.

- Peqqinnissaqarfimmi aqutsisut sulisullu ullut tamarluinnaasa atugassarititaasut ajornakusoortut atorlugit suliaqartarnerat tulluusimaarutigalugulu tulluusimaarutigiuaannassavara, taanna oqarpoq.

Nunatsinni Peqqinnissaqarfiup nakorsat pisortaata Berit Bjerre Handbergip suleqatiginera nuannaarutigisimavaat, pisortaq Tina Amondsen Sermitsiaq.AG-mut allappoq, suliassallu amerlallutillu annertusimasut – minnerunngitsumik nunarsuaq tamakkerlugu tuniluuttoqarnerata isumaginerani.

Peqqinnissaqarfimmi aqutsisut nakorsat aqutsisut peqatigalugit nakorsat pisortaannik nutaamik nassaartoqarnissaata tungaanut sulianik ingerlatsinissamut periusissamik ujartuipput. Atorfik piaartumik inuttassarsiorneqassasoq, Tina Amondsen ilisimatitsivoq.