Nakorsat pisortaat: Ajoraluartumik angajoqqaat meeqqamik adhd-mut nakorsaataannik tuniniaasartut paasisarparput
Adhd-ertunut nakorsaatit allanit pissarsiarineqartarnerat takuneqakkajuttarpoq, Peqqinnissaqarfimmi nakorsat pisortaat taama ilisimatitsivoq.
Inuit adhd-mik innarluutillit nakorsaatiminnik tuniniaasannginnissaat, tarnikkut nappaatilinnut ilisimasallit qanoq qulakkeersinnaavaat?
Ritalinip unioqqutitsilluni tuniniaanikkut qanoq atornerlunneqartarnera pillugu. Tusagassiorfiup allaaserisaanut arlalinnut malitsigitillugu, Peqqinnissaqarfimmi aqutsisunut Sermitsiaq.AG-p taanna apeqqutigaa.
Peqqinnissaqarfimmi nakorsat pisortaata, Berit Bjerre Handbergip akissutaa ersarilluinnarpoq:
- Ajoraluartumik taamaaliortoqarsinnaanngilaq.
Nangilluni oqarpoq:
- Adhd-mut nakorsaatit tunniussiffigineqanngitsunit pissarsiarineqartarnerat ajoraluartumik takussaakkajuttarpoq. Angajoqqaat meeqqamik nakorsaataannik tuniniaagaangata, imaluunniit nakorsaaserneqartoq tuniniaagaangat, nakorsat pisortaat allagaqarluni taama akissuteqarpoq.
Dronning Ingridip Peqqissaaviani nunap immikkoortuani nakorsap aqutsisup, Jesper Olesenip oqarnera naapertorlugu, ajornartorsiut ilungersunarluinnarpoq, nakorsat ataasiakkaat nakorsiartumut tatiginnikkunnaaratarsinnaammata.
Iisartakkanik atornerluinermik pinaveersaartitsineq
Danmarkimi Regionspsykiatrien Midtimi nakorsaaneq, Preben Friis, Danmarkimi inunnut adhd-ertunut atornerluisunut imaluunniit atornerluisuusimasunut Atomoxetininik nakorsaasiisoqartartoq ilisimatitsinikuuvoq. Atomoxetin atornerluilersitsisinnaannginneranik tamanna pissuteqarpoq.
Preben Friisip oqarnera naapertorlugu, Atomoxetinip sunniutai Ritalinimit pitsaanerunngillat, kisianni pineqartup iisartakkanik amerlasuunik atuilernissaannut aamma pinngitsuuisinnaajunnaarnissaanut imaluunniit tuniniaanissaanut pinngitsoortitsisarpoq.
Atomoxetin Danmarkimisut nunatsinni aamma nakorsaasiunneqartarpoq, Berit Bjerre Handberg oqarpoq.
- Nakorsap immikkut ilisimasallip misissuineranut atatillugu nakorsiartup apersorluarneqarneratigut, aanngajaarnartunik imaluunniit aanngajaarniutinik pinngitsuuisinnaajunnaarsimannginnersoq qulakkeerneqartarpoq, nangilluni oqaatigineqarpoq. Berit Bjerre Handbergip oqarnera naapertorlugu nakorsamut ajornakusoorsinnaasarpoq, taamaattumillu nakorsiartup nakorsaatinik atuinera piffissap ilaani nakkutigineqartariaqartarpoq.
