Arctic Winter Games
Nakorsat AWG-qarnerani timersortartut isumagilluarpaat
Nuummi ukiuunerani unammiuaarnerit ingerlanneqarneranni naammassisimasatik Peqqissutsimut Aqutsisoqarfiup naammagisimaarpai
AWG 2016-ip ingerlanneqarnerani timersortartorpassuit avataaneersut isiginnaariartuilu passunneqarluartarlutillu isumagilluarneqarput. Tamanna peqatigalugu nakorsiartut ilimagisamit ikinnerusimapput.
Naggussakkut seqqukkullu ajoqusernerit amerlanerupput
Nuummi issittormiut unammiuaarnerisa kingorna ataatsimut isigalugu Peqqissutsimut Aqutsisoqarfik taamatut inerniliivoq, piffissamilu tassani Dronning Ingridip Napparsimmvissuani nakorsiartarfimmi immikkut sulisoqarnikkut allanillu pinartoqarnerani aaqqiissuteqarnikkut, Nuummiunngorallartut 2.000-t missaanniittut ajoquseraluarpata passunneqarnissaat qulakkeerneqassalluni.
– Seeqqukkut pilluttoornerit naggussakkullu ajoqusernerit amerlanerpaajusimapput, Sermersuumi nakorsaaneq Jesper Olesen oqaluttuarpoq.
– Ataaseq unitsinneqarpoq, tamatumali saniatigut sapaatip akunnera eqqissisimanarsimavoq.
Nakorsiat amerlanngillat
Arctic Winter Gamesip illoqarfiit pingaarnersaanni ingerlanneqarnissaani tikerartorpassuaqarnissaa pissutigalugu nunap ingerlatai allarpassuit assigalugit aamma peqqinnissaqarfiup upalungaarsimanissani siusissukkut aaqqissuussimavaa.
Assersuutigalugu ulllukkut unnukkullu peqqissaasumik immikkut sulisoqartarpoq, nakorsiartarfimmilu immikkut nakorsamik ataatsimik sulisoqartarluni, kiisalu pinartoqartillugu saarngit nakorsaannik, fysioterapeutimik kigutilerisumillu ikortissarsiortoqarsinnaavoq.
Illoqarfimmi inuit amerleriangaatsiarsimagaluartut nakorsiartarfimmut nakorsiartut imatorsuaq amerleriarsimanngillat.
Unammiuaarnerit nalaanni nunanit allaneersut kalaallit peqqinnissaqarfiannik misiginnittut iluarisimaarinnipput passunneqarnertillu naammagisimaarlugu, nakorsaaneq oqarpoq.