Skip to main content

Nakorsassaaleqineq: Nakorsanngornianik sulisoqarsinnaalernissaq isumaliutigineqartoq

Peqqissutsimut naalakkersuisoq Martha Abelsen (S) nakorsanik amigaateqarnermik qaangeerusuppoq. Taassuma peqqissutsimut ministeri Magnus Heunicke (S) ataatsimeeqatigeqqammerpaa, sulisussarsiornermi unammillernartut iluarsiivigineqarnissaat anguniarlugu.

Kalaallit Nunaat nakorsanik peqqinnissaqarfimmilu suliaqartunik allanik amigaateqarpoq. Piffissami aalajangersimasumi paarlattaasussanut aningaasartuutit ukiut tamaasa amerlerialaartarput. Ajornartorsiummut aaqqiissutissat misissoqqissaarneqarput. Aaqqiissutissatut eqqarsaatigineqartut ilagaat, assersuutigalugu Hillerød Hospitalimiit nakorsanngorniartunik Dronning Ingrid Hospitalimi turnusimik taallugu, tassa nakorsanngulersunik, sulisoqartalernissaq.

- Nakorsanngornianik nakorsanngulersunik sulisoqartalernissaq pillugu Danmarkimi peqqissutsimut ministeri oqaloqatigaara. Tassani suli aalajangiisoqanngilaq. Kisiannili neriorsorneqarpunga napparsimmavissuit peqqinnissaq pillugu siunnersuisoqatigiivisa siulittaasui naapilerunigit sammisaq oqaloqatigiissutigissagaa, Martha Abelsen nassuiaavoq.

Martha Abelsenip peqqissutsimut ministeri Magnus Heunicke (S) augustip 28-ani ataatsimeeqatigaa, ataatsimiinnermi eqqartorneqartut allat ilagaat kalaallit Danmarkimi angerlarsimaffeqanngitsut aamma kalaallit piffissami aalajangersimasumi Danmarkimiittut peqqinnissakkut sullinneqarnerannut periarfissat.

Aningaasartuutit qaffasilluinnartut

Peqqissutsimut naalakkersuisup, Martha Abelsenip, paragraf 37 atorlugu Jens Napaattuup (PN) akissuteqaataa naapertorlugu taartaasartut allaffeqarfii namminersortut aqqutigalugit nakorsanut 16,9 milliuunit koruunit aamma peqqissaasunut 41 milliuunit koruunit 2018-imi aningaasartuutigineqarsimapput.

Taakkununnga aningaasartuutit katillugit 57,9 milliuunit koruuniupput.

Ukioq manna maj qaammat ilanngullugu nakorsanut 2,5 milliuunit koruunit aamma peqqissaasunut 16 milliuunit koruunit atorneqareersimapput.

- Sulisussarsiornermi unammillernartunut aaqqiissutissamik allaanermik nassaarsinnaagutta, nakorsanut peqqissaasunullu taartaasartunut aningaasartuutigut apparsinnaassagaluarput, Martha Abelsen oqarpoq.

Nakorsanngorniat nakorsanngulersut

Nakorsat, suli ilinniakkaminnik naammassisimanatik specialinik aalajangersimasunik ilinniartut turnusinik taaneqartarput.

Turnuseqartitsilluni nakorsanngorniartunik nakorsaqarneq iluatsissappat napparsimmavik suliffigisaat ilinniarsimasunik nakorsaqarluartariaqarpoq, ilinniartitsisinnaasuni aqqutissiuussisinnaasunillu.

- Tamanna isumaqarpoq nakorsanngornianik turnusertunik Dronning Ingridip Napparsimmavissua atorneqarsinnaasoq, soorunami Danmarkimi napparsimmavissuit suleqatigilersinnaassagutsigit.

Martha Abelsenip ilisimatitsissutigaa peqqissutsimut ministeri neriorsuisimasoq napparsimmavissuit peqqissuseq pillugu siunnersuisoqatigiivisa siulittaasui naapilerunigit nunatsinni turnuseqartitsilluni nakorsaqarsinnaaneq oqaloqatigiissutissatut ilanngutissallugu. Ataatsimiinneq qaammammi matumani ingerlanneqassaaq. Ataatsimeereernerullu kingorna napparsimmavissuit arlaat soqutiginnissappat oqaloqatigiinnerit tassanngaanniit aallartinneqarumaarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER