Nakorsaq: Isornartorsiuerujussuartoqartillugu politikerit aatsaat qisuariartarput

Nunap immikkoortuani nakorsaq aqutsisuusoq Peter Vedsted politikerinut, peqqinnissaqarfiup amigartumik aningaasalersorneqarneranut akisussaasunut, sakkortuumik isornartorsiuivoq. Politikerit taqeqqajaavallaarput peqqinnissaqarfimmilu sulisunik saassutarineqarpallaartitsisarlutik.

Nakorsatut atorfik nunap immikkoortuani nakorsatut maani atorfigisara sulisoqarnermut akisussaaffeqarluni allaffissornermullu akisussaaffeqarluni nakorsaanerunissamik malitseqarpoq. Kisianni pissutsit maannakkutut itsillugit, nakorsatut suliaqarneq allaffissornikkut suliassanit taallersimaneqarpoq.

Nunap immikkortuani nakorsaq Peter Vedsted Avannaani Ilulissani ukiuni tallimani sulereerluni Kalaallit Nunaanni peqqinnissaqarfimmi naggataangajalerpoq. Ukiut sapaatip-akunneranut akunnerni 70-init 80-inut suliffiusut sapaatip-akunnerisalu naanerini arlaqanngitsuinnarnik sulinngiffeqarfiusut amerlasimapput.

Piffissaq taanna novembarip 1-ani qaangiutissaaq.

Aviisi AG taama allappoq.

- Ukiut taakkua tallimat ingerlaneranni ’angerlarsimaffik’ Ilulissaniissimavoq, aamma meeqqanit sisamanit ernuttanillu arfinilinnit nuliaralu marluulluta utaqqineqarpugut. Ilaquttat utaqqipput, tamannalu qilanaaraarput, naak uummatitsinni maani Avannaaniikkaluarluta, Peter Vedsted, inissaqamik inuttaqanngitsumik qimatsisussaq, oqarpoq.

- Kingoraartissannik suli pissarsisoqanngilaq. Tamannalu tupaallaatiginngilara. Kalaallit Nunaanni atorfimmik taama ittumik tigusinerup alloriarnerujussuusarnera aamma nukippassuarnik piumassuseqarnerujussuarmillu piumasaqarfiusarnera ilisimaarineqarluarpoq. Maangalu tikinnermi suliassaq tupaallaatigineqarsinnaasarpoq.

Taanna nassuiaalluni oqarpoq, sulisunut assigiinngitsorpassuarnut suliffimmik pitsaasumik pilersitsinissaq suliassami qitiulluinnartoq annerpaamillu pisariaqartitsisunut peqqinnissakkut sullissinernik pitsaasunik tunniussaqarnissaq.

Kisianni aamma Kalaallit Nunaanni peqqinnissaqarfiup naalakkersuinikkut aqunneqarnera aamma eqqumaffigineqartussaavoq. Politikerinillu peqqinnissaqarfimmut akisussaaffeqartunik takusaqarsimanngilaq.

- Piffissaq Kalaallit Nunaanniiffigisara tamakkerlugu qallunaanik politikererpassuarnik allanut atatillugu maaniittunik ilassisaqartarsimavoq, kisianni Peqqissutsimut Naalakkersuisumik, uagutsinnik peqqinnissaqarfimmiittunik oqaloqateqariartorluni maaniittumik, suli oqaloqateqarsimanngilanga. Nunammi immikkoortuatut sulinerma nalaani marlussunnik naalakkersuisoqarsimavoq. Tamannalu naammaginanngilaq. Peqqinnissaqarfiup immikkoortuani tassani politikereqanngilaq uannut ima aperisimasumik: Suliassaq qanoq ililluta peqatigiilluta aaqqissinnaavarput? Ulluinnatit qanoq ittuuppat?, Peter Vedsted oqarpoq.

Aviisimi AG-mi atuarnerusinnaavutit. Aviisi uani pissarsiariuk:

Powered by Labrador CMS