Nakorsaatit ulorianartut napparsimmavimmiit tillinneqartut
Politiit Nunattalu Nakorsaanera, nakorsaatinik ulorianartunik, Qaqortup napparsimmavianit decembarip arfineq-pingajuani tillinneqarsimasunik iioraasoqarnissaanut mianersoqqusipput.
Nakorsaatit Ritalin Uno aamma Motiron annertungaatsiartut Qaqortup napparsimmavianit tillinneqarput. Iisartakkat naqiguttartunik simillit iisartakkallu eeriaannaat assigiinngitsunik sakkortussuseqartut katillugit 2.662-it tiguneqarsimapput.
- Misilittagaqanngitsunut nakorsaatut ulorinarput, politiit tusagassiutinut nalunaarumminni ilisimatitsipput.
- Tillinniartoqarneranut tunngatillugu ilisimannittut politiinut ilisimatitseqquneqarput, iisartakkanillu neqeroorfigitissimasut aamma oqaloqatigerusuppagut, politikommissær Knud Frederiksen paasissutissiivoq.
Ersiutaasut
Tilleruluttoorneq, meriannguneq, sajulerneq kiaqalernerlu iisartakkanik pineqartunik iisinermi ersiutaasartut ilisimatitsissutigineqarpoq. Iisartakkallu tarnikkut ersiuteqartitsisarput kingunerlutsitsisinnaasunik. Atuereernermi qasorujussuarneq nikallungarujussuarnerlu malugineqartarput. Toqunartoqalersoorneq inuunermik navialisitsisinnaasoq nalunaarutigineqarpoq.
- Inuit ilisimaasallit Qaqortumi politiinut nalunaaqquneqarput, uunga sianerlutik 701122, sillimasut pisortaat ilisimatitsivoq.