Nakorsaatinik atornerluineq: Nakorsap nakorsiartullu tatigeqatigiinnerannut aporfilersuivoq
Nakorsaatinik atornerluinerup pinaveersaartinneqarnissaa ajornakusoorsinnaasoq, nakorsaanerit marluk nassuiaapput, Ritalin ilanngullugu. Nakorsaatinik allanik toqqagassaqarpoq, kisianni tatigeqatigiinnermut tunngavoq, taakku oqarput.
- Atuineq nakkutigaarput.
Danmarkimi Regionspsykiatrien Midtimi nakorsaaneq, Preben Friis, iisartakkanik atornerluinerup pinaveersaartinneqarneranut atatillugu taama nasssuiaavoq.
Qanoq amerlatigisunik nakorsaasiisoqartarnera pingaartinneqartartoq ilaatigut oqaatigaa, nakorsat ataasiakkaat taamaalillutik atugassanit amerlanerusunit tunniussisassanngimmata.
- Atornerluinermut tunngatillugu Ritalininik kisiat ajornartorsiuteqartoqanngilaq. Aamma Stesolid morfiinillu ajornartorsiutigineqarput, ilaasa tunniunneqartut allanut tuniniartarpaat, taanna oqarpoq.
Nakorsiartumut tatiginninneq
Dronning Ingridip Peqqissaaviani Nuummi nunap immikkoortuani nakorsaaneq, Jesper Olesen isumaqataavoq.
- Napparsimasup qanoq anniartigineranik uuttuuteqarsinnaanngilagut, taanna oqarpoq, peqqinnissaqarfimmilu sulisut ilaatigut tatiginninnerat misilittarneqarsinnaasartoq nassuiaavoq.
Taanna assersuuteqarpoq: Napparsimasup nipaallisaammik ataatsimik ulluni qulini iisisassasoq isumaqatigiissutigineqarpoq. Napparsimasorlu ullut tallimat qaangiummata uteqqippoq, ullormut iisartakkat marluk iiorarlugit iluarinerarpaa.
- Taamatut pisoqartillugu ilumoornera ilimagissavara, kisianni nakorsiartup salluliorfigineraanga qulakkeersinnaanngilara, tassami iisartakkat affai tunisimasinnaavai, taanna oqarpoq, nangillunilu:
- Nalorninarpoq, tassami nakorsap napparsimasullu attaveqatigiinnerat pineqarpoq.
Iisartakkat atornerlunneqarsinnaasunut tunngatillugu unammillernarnerusoq taanna isumaqarpoq, tassami inuit tamakku pillugit iliuusissaarulluinnartarmata.
- Ilaat misigittaassimanermut tatiginninnitsinnik atornerluillutik nakorsaatinik allanut tuniniaasarsimanerat ajorluinnarpoq, tassami nakorsiartutsinnut tatiginnikkunnaaratarsinnaagatta.
Ritalinimut taartissaasinnaasoq
Danmarkimi nappaatinut arlalinnut nalinginnaasumik katsorsaasarnerit nunatsinnitut ipput, soorlu Ritalin uerinartortalik. Inuk adhd-ertoq atornerluisuusimappat imaluunniit atornerluinermut tunngasunut attuumassuteqarsimappat, allatut iliuuseqartoqartartoq, Preben Friis nassuiaavoq.
- Taakku (adhd-ertut atornerluisut imaluunniit atornerluisuusimasut, aaqq.) Ritalinimik atornerluilersinnaasartut nalunngilarput. Taamaammat Atomoxetinit taarsiullugit tunniuttarpagut.
Danmarkimi RAADS (Napparsimmavimmi nakorsaatinut akisuunut atuinermut siunnersuisoqatigiit) nassuiaanerat naapertorlugu, Atomoxetin uerinartuunngilaq. Tassa Ritalinip akerlianik atornerluinermut attuumassuteqanngilaq.
Ritalinip atornerlunneqaratarsinnaasup ataatsimut isigalugu sooq Atoxometinimut taarsiullugu tunniunneqarnerusarnersoq apeqqummut, Ritalinip sunniuteqarluarnerusarnera Preben Friisip akissutigaa.
Ussernartorsiorsinnaasut
Atornerluisunut imaluunniit atornerluisuusimasunut Atomoxetinimik tunniussisarneq, nakorsaanerup oqarnera naapertorlugu, taakku atornerluinissaat – nammineq pisartakkaminnik annertusititsillutik pinngitsuuisinnaajunnaarnissaannik ernumassuteqartarnermik pissuteqarpoq.
- Inuit atornerluisut nalinginnaasumik pinerusarput – sianerlutillu amerlanerusunik piniarsarisarput, iisartakkat qimmiminnit nerineqarsimanerarlugit imaluunniit katassimanerarlugit.
Atornerluiffiusunik avatangiiseqaraanni nakorsaatinik tuniniaanissamut ussernartorsiortoqarsinnaavoq imaluunniit allanut paarlaanneqarsinnaasarput.
Jesper Olesenip oqarnera assigalugu, nakorsat tunngaviusumik nakorsiartunut assersuutigalugu atornerluisuunerlutik imaluunniit atornerluisuunnginnerlutik oqaatiginnikkaangata unneqqarittarnerannut tatiginnittartut oqarpoq. Nakorsaq tamatuminnga misissueqqinneq ajorpoq, taanna nassuiaavoq.
Peqqinnissaqarfimmi Danmarkimisut nakorsaatinik allaanerusunik inunnut adhd-ertunut tunniussisoqartarnersoq Sermitsiaq.AG-p paasiniarpaa. Peqqinnissaqarfimmili aqutsisut suli akissuteqanngillat.