ilisimatusarneq
Nakorsaat pisiarineqarsinnaasoq angutit inuusuttut hormoniannik ajoqusiisinnaasoq
Nipaallisaatit ibuprofenit pisiniarfinni pisiarineqarsinnaasut, angutit hormonimik testosteronimik pilersitsiortornerannik ajoqusiisinnaavoq.
Ibuprofen ullut 14-iinnaat atorneqartilluni angutip issumini testosteronimik sanaartorneranut ajoqusiisinnaavoq.
Rigshospitali tusagassiuutinut nalunaarummi taama allappoq.
Danskit franskillu ilisimatusarnerat naapertorlugu, angutit inuusuttut hormoniisa oqimaaqatigiissaarnerat angutini utoqqarni takuneqartartutut iisartagaq kinguneqartitsisinnaavoq. Ilisimatusarneq atuagassiami PNAS-imi saqqummiunneqaqqammerpoq.
- Testosteroneqassutsip allanngorannginnissaa angutinut pingaaruteqarpoq. Ibuprofen angutit testosteroneqassusaannut appartitsingaatsiartarpoq, qarasaq iliuuseqartariaqartarluni, Dansk Hovedpinecenterimi Rigshospitaletimi ilisimatooq, David Møbjerg Kristensen oqarpoq.
Testosteron ilaatigut nukit sannaannut, isumagissaarnermut aamma kinguaassiorsinnaanermut iluaqutaasarpoq.
Ibuprofen pisiniarfinni Iprenimik, Brufenimi aamma Ibumetinimik taaguuteqarluni pisiassaasarpoq.
Ilisimatusarnerup inerneri ernumanartutut isigineqarput, inuit tamarmik nipaallisaatit - soorlu ibuprofen - nakorsaativiunngitsutut isigigaat misissuinermi paasineqarnikuummat.
- Nakorsaatit tamarmik saniatigut sunniuteqartarput, naak aamma pisiniarfinni pisiarineqarsinnaagaluarlutik. Tamanna piffissaatillugu aamma piffissaatinnagu nipaallisaatitortarnermik kinguneqarsinnaavoq, David Møbjerg Kristensen oqarpoq.
Ilisimatooq naapertorlugu angutit inuusuttut misilittarneqartut nakorsaatip kinguneri namminneq malugisinnaasimanngilaat.