Nakorsaaneq: Nutaanik tunillatsittoqanngilaq
Misiligutit 89-it nutaat Nakorsaaneqarfimmit tiguneqarput, taakkunanngalu tunillatsittoqarsimanngitsoq nalunaarutigineqarpoq. Tunillatsissimasumik aamma ataatsimik peqqissisoqarsimasoq ilisimatitsissutigineqarpoq
- Allanik suli tunillatsittoqarsimannginnera ajunngilluinnartuuvoq. Tassuuna takuneqarsinnaavoq tunillaassortoqannginnissaanut periuserineqartoq siunertamisut ingerlanneqartoq. Nunatsinni nappaatip tuniluulluni siaruaanneranut takussutissaqanngilaq, tamannali qularnaarlugu oqaatigisinnaanngilarput. Tamannali ulluinnaat ingerlaannaq takkuteqqinnissaannik isumaqanngilaq. Tamattaalluta eqqiluisaarnissamut tunngatillugu siunnersuutinik peqqusinernillu atorneqalersunik malinninnissarput suli pingaartorujussuuvoq, tusagassiutinut nalunaarummi nakorsaaneq Henrik L. Hansen oqarpoq.
Utaqqineqartut
Katillugit inuit 541-t misiligutissanik tigusiffigineqarsimapput, taakkunanngalu 485-it tunillatsissimanngillat qulillu tunillatsissimallutik. Tunillatsissimasunit pingasut peqqissisutut nalunaarutigineqarput, sinnerilu peqqissingajalerlutik.
Misiligutissat 46-t Københavnimi laboratoriamut ingerlaartut akissuteqarfiginissaat utaqqineqartut ilisimatitsissutigineqarpoq.
Ullumi misiligutinik kingusissukkut tikittoqarnera pissutigalugu innuttaasut misiliguteqarfiusimasut suli oqarasuaatikkut sianerfigineqaqattaarput.