Nakorsaaneq: Kalaallit Nunaat malinnaaffigeqqissaarneqarpoq
Kalaallit Nunaat Danmarkimit coronavirusimik eqqugaannginnerugaluartoq Danmarkimi napparsimaveqarfiup politeeqarfiullu Nunarput ukkataraat
Kalaallit Nunaanni coronavirusi Statens Serum Institutimit Anders Kochimit malinnaaffigeqqissaarneqarpoq.
Kalaallit Nunaat soqutigineqarluartoq oqarpoq.
- Statens Serum Institutimit ministerit tikillugit Kalaallit Nunaat malinnaaffigeqqissaarneqarpoq, Anders Koch oqarpoq.
Kalaallit Danmarkimi napparsimaveqarfiliaassisoqassappat periarfissaq atorluarneqartariaqartoq isumaqarpoq.
- Napparsimaveqarfinni aamma Rigshospitalimi sulisut Kalaallit Nunaannut ikiuerusuttorujussuupput, Naalagaaffeqarfeqatigiinnermi kikkut tamat assigiimmik sullinneqarnissaat kissaatigineqarpoq, Anders Koch oqarpoq.
Attaveqaqatigiinneq
Taanna Infektionsmedicinsk Klinikimi aamma nakorsaanertut atorfeqarpoq, ilaatigullu aamma Nunatsinni sakialluummut nakorsaanerulluni. Coronavirus pillugu ilisimasani taamaasilluni suleqatiminut Kalaallit Nunaanniittunut ingerlateqqittarpai.
Videokkut ataatsimiinnikkut taakku ingerlasarput, tassani suut iluaqutaasarnersut ilaatigut eqqartorneqartarlutik.
Ilisimaneqarpallaanngitsoq
Naak misilittagaqartoqarluaraluartoq coronavirusip tamakkiisumik ilisimaneqarnera amigartoq oqaatigaa.
- Ilisimatussutsikkut suli paasisassanik amigaateqartoqarpoq, taamaattumik coronavirusi pillugu ilaatigut suliniarneq ajornakusoorsinnaavoq, Anders Koch oqarpoq.
Taamaattoq Danmarki maanna coronavirusi pillugu ilisimasai ullut tamaasa amerliartorput, Nunatsinni atorluarneqarsinnaallutik. Ilisimasat nutaat Nunatsinnut nassiussuunneqartut amerlanerpaat Anders Koch-imeersuupput.