Nakkutilliisuutitat isornartorsiummut oqaaseqarnianngitsut
Inatsisilerinermi atuakkami nutaami Kommuneqarfik Sermersuumi inissaqartitsiniarluni suliap ingerlanneqarsimanera isornartorsiorneqarpoq. Nakkutilliisuutitat ilisimatitsipput, siunnersuineq pissarsiarineqarsimasoq tatigineqartoq.
Sermitsiaq.AG-mit sapaatip-akunnerata matuma aallartinnerani oqaluttuarineqarpoq, nunami maani kommuninut inatsisitigut malittarisassat pillugut ilinniutitut nutaamik atuakkiortoqarsimasoq. Atuakkami sammineqarput, Naalakkersuisut nakkutilliisuisa Kommuninilu Nakkutilliisuutitat malittarisassaat.
Atuakkiortup inatsisilerituullu Morten Egnbergip nakkutilliisut Nakkutilliisuutitallu suliamik suliarinnissimanerat atuakkami isornartorsiorpaa.
Morten Engberg isumaqarpoq, nakkutilliisut Nakkutilliisuutitallu pisinnaatitaaffimminnik arlalitsigut qaangiisimasut. Inatsisilerituup erseqqissaassutigaa, suliami pineqartoq - tassa Kommuneqarfik Sermersuup namminersortut inaataannik attartoriarluni amigartoorutaasumik innuttaasunut attartortitseqqiisarnera isummerfigisimanagu - taamaallaalli suliamik suliarinnissimaneq sammisimallugu.
Sermitsiaq.AG-mit Nakkutilliisuutitat isornartorsiummut oqaaseqartinniarneqarsimapput. Nakkutilliisuutitalli siulittaasuat Sólja í Ólavsstovu tusagassiorfitsigut naatsumik nalunaaruteqarluni ilisimatitsivoq, Nakkutilliisuutitanit atuagaq atuarneqarsimanngitsoq:
Siunnersorneqarsimaneq tatigilluinnarneqartoq
- Nakkutilliisuutitat ilinniutitut atuakkiaq ”Kommunestyret i Grønland”, ilaatigut Nakkutilliisuutitat aalajangiussaannik oqaaseqaatigisimasaannillu isornartorsiuisoq pissarsiarisimanagulu atuarsimanngilaat.
- Nakkutilliisuutitat inatsisitigut siunnersuutit pissarsiarisimasatik tatigilluinnarpaat, nakkutilliisuutitat siulittaasuat, Nakkutilliisuutitat suliamut allanik oqaaseqaatissaqanngitsut erseqqissaasoq oqarpoq.
Inissaqartitsiniarluni suliap ingerlanneqarnerani Nakkutilliisuutitat Naalakkersuisullu nakkutilliisui Eqqartuussissuserisoqarfimmit Poul Schmithimit inatsisitigut ikiorserneqarsimapput. Siorna decembarip qaammataani allagaatinik takunnissimanerup takutippaa, Naalakkersuisut nakkutilliisuisa Nakkutilliisuutitallu kiisalu Kommuneqarfik Sermersuup inissaqartitsiniarluni suliamut atatillugu eqqartuussissuserisunik ikiorteqarnerminnut to millioner koruunit sinnerlugit atorsimagaat.
Sermitsiaq.AG-mit sapaatip-akunnerani kingullermi naalakkersuisoq Jess Svane (S) oqaaseqartinniarneqarsimavoq, Naalakkersuisut nakkutilliisui Svanep naalakkersuisoqarfianut attuumassuteqarmata. Naalakkersuisulli Nakkutilliisuutitat allattoqarfiat innersuussutigisimavaa, allattoqarfimmit aamma isornartorsiut oqaaseqarfigineqarusunngilaq.