Nakkutilliisut: Sulianut 59-nut unnerluussisut aalajangernissaat utaqqivarput
Aalisartut 6 meteri sinnerlugu umiatsiaararsortut angalatersortullu ukiut tamaasa 1. juli nallertinnagu angallamminnik inuussutissarsiornertik pillugu nalunaarsuisussaatitaapput. Aalisartunit nalunaartussaatitaasunit 254-iusunit 59-it 2018-mi nalunaarsuisimannginnertik pillugu unnerluussisunut suliassanngortinneqarnikuupput
Taamaattorli taakku qaavisigut aamma 129-it politiinut suliassanngortinneqarnissaminnik naatsorsuutiginnissinnaapput, taakkumi 2019-mi nalunaartussaatitaanertik naammassisimanngilaat, Sermitsiaq allappoq.
Taakkunannga 129-iusunit qassit uteqqiasumik nalunaarsuinngitsoortarsimanersut suli ilisimatitsissutigineqanngilaq, taamaattorli ukioq manna unnerluutigineqartussanngortinneqartut tamarmik uteqqiasuunngitsut missingersorutsigu, taava aalisartunit 254-nit nalunaartussaatitaasunit 66-it kisimik inatsisinik malinnissimapput (Inuussutissarsiutigalugu aalisarnermi aammalu nunami tunisassiorneq pillugu tunisassiornikkut aningaasaqarnikkullu paasissutissanik nalunaarutiginnittarneq pillugu Namminersorlutik Oqartussat nalunaarutaat nr. 11, 1. august 2017-imeersoq naapertorlugu).
Sermitsiamit Kalaallit Nunaanni Aalisarsinnaanermut Akuersissutinik Nakkutilliisoqarfik (KANUAANA) attavigaarput paasiniarlugu aalisartut inatsisinik malinninnissaat taannalu tunngavigalugu nalunaartussaatitaanerminnik naammassinninnittarnissaat anguniarlugu qanoq iliortoqarnersoq.
Politiinut nalunaarutiginninnerit 59-it suli naammassineqanngillat
KANUAANA inatsisitigut pisinnaatitaaffeqanngilaq nammineq akiligassiissalluni. Allatut iliortoqarsinnaanngimmat KANUAANA-p nalunaartussaatitaanerminnik sumiginnaasimasut politiinut unnerluussisunulluunniit tamatigut nalunaarutigisariaqartarpai:
– 2018-mi nalunaarsuisimannginneq pissutaalluni aalisartut 59-it unnerluussisunut nalunaarutiginikuuagut innersuussutigalugu akiligassinneqassasut. Tamanna sioqqullugu aalisartut nalunaartussaatitaasut siumoortumik ilisimatippavut, tamannalu pivoq 2018-mut tunngatillugu nukingisaarutit aappassaat nassiussoratsigit. Suliat naammassinissaannut piffissaq sivisooq atorneqartariaqarsinnaasarpoq. Piffissami matumani unnerluussisut utaqqivagut tunniussat 59-it 2018-mi nalunaartussaatitaanerminnik sumiginnaasimanerat pillugu nalunaarutigineqarnikuummata, suliallu taakku suli naammassineqaratik, KANUAANA-mit erseqqissaatigineqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: