Skip to main content

Nakkutilliisut paasissutissanik nutaanik saqqummiussipput

Paasissutissani taakkunani takuneqarsinnaavoq, isornartorsiutigineqartut annersaat Asii Chemnitz Narupip borgmesteriunerata nalaani suliarineqarsimasut. Nakkutilliisut aamma allassimavaat, kommuni nakkutilliisut suliniarnerannut aporfilersuisimasoq.

Kommuneqarfik Sermersuumit Nakkutilliisut kommunimut isoarnartorsiuinerannut tunngavilersuutinik ujartuisoqarsimasoq. Nakkutilliisut Allattoqarfiata sapaatip-akunnerani matumani siusinnerusukkut isornatorsiutitik erseqqissaaffigalugit allannik kommunimut nassiussimmata piumasarineqartoq naammassineqarsimavoq.

Allagaatit qulingiluanik quppernillit kommunalbestyrelsip marlunngornermi ataatsimiinnerani oqaluuserisassanut ilanngunneqarsimapput, tassanilu paasinarsivoq, isornartorsiutigineqartoq ataaseq borgmesterip iliuuserisarsimasaanut tunngassuteqartuusut, Asii Chemnitz Narupip (IA) borgmesteriunermini suliarisarsimasaanut sammitinneqartoq.

Nakkutilliisut tunngavilersuumminnik kommunimut nassiussinissartik sioqqullugu ilisimatitsissutigisimavaat, Kommuneqarfik Sermersuumi borgmesterip pisuni pingasuni Aningaasaqarnermut Ataatsimiititamut akuersititseqqaarani namminersortunut attartornissamik isumaqatigiissuteqartarsimanera nakkutilliisunit isornartoqartinneqartoq.

Nakkutilliisut tunngavilersuumminnik itisiliillutik oqaatigisimavaat, borgmesteri Aningaasaqarnermut Ataatsimiititami aalajangiunneqarsimasut avaqqullugit imaluunniit namminersortunut attartornissamik isumaqatigiissuteqarnissaq Aningaasaqarnermut ataatsimiititamut akueriteqqaarnagit, 2017-imi januaarip 24-ani, 2017-imi aggustip 14-iani aamma 2016-imi novembarip aqqarnani namminersortunut attartornissamik isumaqatigiissuteqarsimasoq.

Marlunngornermi ullaakkut tunuartoq

Asii Chemnitz Narup ineqarnermut suliaq innersuussuigalugu marlunngornermi ullaakkut aningaasaqarnermut naalakkersuisutut tunuarpoq.

Asii Chemnitz Narupip tassunga atatillugu oqaatigaa, namminersortunut attartornissamik isumaqatigiissuteqarnermi nammineq ingerlatsiuvullu periuseq ingerlatartik inatsisitigut eqqortuusoq aamma politikkikkut pisariaqartinneqartumik akueritissimallukku.

Ilanngullugu Nakkutilliisut aalajangiinerminnut tunngavilersuutaannik takusaqarsimannginnini isornartorsiorpaa, erseqqqissaassutigalugulu inatsisitigut kukkusumik tunngaveqarluni ingerlatsisoqarsimassappat, aningaasaqarnermullu ataatsimiititaq akuliutsinneqarsimanngippat ajuusaarutigalugu.

Nakkutilliisut Allattoqarfiata ajuusaarutigaa, Nakkutilliisut novembarip qulingiluaani ataatsimiinnerminni aalajangiinerannut tunngavilersuutit ataatsimeereernerup kingorna ullorpaaluit qaangiutereersut aatsaat kommunimut nassiunneqarnerat:

- Nakkutilliisut Allattoqarfianit ajuussaarutigissavarput, Nakkutilliisut aalajangiinerminnut tunngavilersuutaat allakkami Nakkutilliisut ataatsimeereerneranni Kommuneqarfik Sermersuumut nassiunneqartumi ilaatinneqannginnerat. Tamatumunnga pissutaavoq, Nakkutilliisut Allattoqarfiata salliutissimammagu, kommuni aalajangiussap imaanik siullertut ilisimatinneqarnissaa, Nakkutilliisut Allattoqarfiat allappoq.

- Kommuni nakkutilliisunut akerliusimasoq

Suliat borgmesteriusimasup nalaani suliarineqarsimasut kisiisa Nakkutilliisunit isornartorsiorneqanngillat. Nakkutilliisunit aamma maanna borgmesteriusup nalaani pissutsit arlallit isornartorsiorneqarput. Nakkutilliisut assersuutigalugu Kommuneqarfik Sermersooq suliamut atatillugu Nakkutilliisunut inatsit naapertorlugu paasissutissiisarsimannginnginnera isornartoqartinneqarluinnarpoq.

Nakkutilliisut isornartorsiuinerminnut tunngavilersuutigaat:

- Nakkutilliisunit paasineqarpoq, Kommuneqarfik Sermersuup suliamut atatillugu atortussanik tunniussinissamut paamaarussisimanermigut, suliamut attuumassuteqanngitsunik arlippassuarnik tunniussisimanermigut aamma aviisini annertuumik ussassaarisarsimanermigut Nakkutilliisut inatsit naapertorlugu suliniarneranut aporfilersuisimasoq.

Nakkutilliisut 2019-imi misissuillutik allartikkamik suliaq pillugu ulloq 10. februar 2020 kommunimut allagaqarsimapput, tamatumalu kingorna suliami paasissutissanik arlaleriarlutik piumasaqartarsimallutik. Tamatuma nalaani Charlotte Ludvigsen (IA) 2019-imi juunip qaammataani borgmesterinngorsimagami kommunimi siuttuuvoq.

Nakkutilliisut: Paasissutissanut tunngaviusut amigaateqarsimapput

Nakkutilliisut aamma suliamut atatillugu isornartorsiuinerminnut tunngavilersuutigaat, politikkerit namminersortunut attartornissamik isumaqatigiissuteqarnermut atatillugu akuersisimanerannut paasissutissat kommunip aningaasaqarnermut ataatsimiititaanut tunniunneqarsimasut amigaateqartarsimanerat.

- Suliat saqqummiunneqarsimasut misissuiffigineranni Nakkutilliisunit maluginiarneqarpoq, suliani tamani paasissutissanut tunngaviusut amigaateqangaatsiarnerat. Namminersortunut attartornissamik isumaqatigiissuteqarnerni politikkikkut kinguneqaataasinnaasunik naliliinissamut periarfissaqartoqarsimanngilaq, Nakkutilliisut allapput.

Nakkutilliisut naapertorlugit, Aningaasaqarnermut Ataatsimiititamut inassutigineqarsimasuni tamani uku amigaataapput:

  • Ukiut qulit ingerlaneranni aningaasaqarnikkut kinguneqaataasinnaasut.
  • Namminersortunut isumaqatigiissutinik nalilersuineq.
  • Suliani pineqartuni aningaasaqarnikkut kinguneqaataasinnaasut katinneqarnerat, aamma aningaasaqarnikkut artukkiisussat tamarmiusut. Tassunga atatillugu oqaatigineqarpoq, pissutsit pineqartut taakku Aningaasaqarnermut Ataatsimiititami immikkut suliarineqarsimasinnaasut - saqqummiunneqarsimanngitsulli.
  • Ineqarnermut tapiissutissatut taarsigassarsinermi aningaasaqarnikkut kinguneqaataasinnaasut. Tassunga atatillugu oqaatigineqassaaq, ineqarnermut tapiissutissatut taarsigassarsinermut aningaasartuutit kommunimit akilerneqartussaammata, tamatumalu kommunip akiliisinnaassusaanut malunnaatilimmik sunniuteqarnissaa naatsorsuutigineqarsinnaasoq.

Suliamut atatillugu paasissutissiisarsimannginneq borgmesterimut akisussaatinneqarpoq: 

- Kommunit aqunneqarnerat pillugu inatsisip § 19-ani allassimavoq, suliat Aningaasaqarnermut Ataatsimiititami suliarineqartut naammattumik qulaajarneqarsimanissaat borgmesterip akisussaaffigigaa, Nakkutilliisut tunngavilersuipput.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER