Nakkutilliisut Ivaaraq ima nalilersimavaat
Sulisut meeqqanik kinguaassiutitigut atornerluisimannginnermut uppernarsaataat akuttunngitsumik piniarneqartassapput, kiisalu kinguaassiornermut tunngasumik politikki nutarsarlugu naammassineqassaaq. Nakkutilliiartortut Ivaaraq pillugu taama naliliisimapput. Angerlarsimaffilli aalajaattunik sulisoqartoq aamma nalilerneqarsimavoq.
Namminersorlutik Oqartussat Nakkutilliinermik Ingerlatsiviata 2020-mi nakkutilliiartornermi kingorna Ivaaqqami sulisut meeqqanik kinguaasiutitigut atornerluisimannginnerannut uppernarsaataannik piumasarnissamik ukkassinerussasut innersuussutigisimavaat.
Namminersorlutik Oqartussani Nakkutilliinermik Ingerlatsiviup 2020-mi nalunaarusiaani tamanna atuarneqarsinnaavoq.
Ivaaraq piffissami kingullermi sammineqangaatsiarpoq. Ulloq unnuarlu angerlarsimaffimmi najugaqartoq - arnaq inuusuttoq 23-nik ukiulik annertuumillu innarluuteqartoq - 2. september meerartaarpoq, naartusimanera sulisunit ilisimaneqarsimanani. Suliaq kinguaassiutitigut atornerluisoqarsimaneratut politiinit maanna paasiniarneqarpoq, arnarmi oqalussinnaananilu pisussinnaanngilaq.
Meeqqanik kinguaassiutitigut atornerluisimannginnermut uppernarsaatit
Nakkutilliiartortut 2020-mi Ivaaqqamiimmata aqutsisut ilisimatitsisimapput sulilersut tamarmik meeqqanik kinguaassiutitigut atornerluisimannginnermut uppernarsaatinik tunniussisartut.
- Nakkutilliinermik Ingerlatsiviup nakkutilliinermut atatillugu erseqqissaassutigaa meeqqanik kinguaassiutitigut atornerluisimannginnermut uppernarsaatit nalilersorneqareersimatillugit sissorteriarlugit iginneqartassasut, sulisulli uppernarsaataannik nutaanik akulikitsumik piniartoqartassasoq. Pinerlussimannginnermut uppernarsaatit allat sulisut paasissutissaataannut tunngasunut ilanngullugit inaalinneqartassapput. Sulisut ataasiakkaat pillugit paasissutissaataanni allassimasassaaq meeqqanik kinguaassiutitigut atornerluisimannginnermut uppernarsaat pineqarsimasoq nalilersorneqarsimasorlu, nakkutilliinermik ingerlatsiviup nalunaarutaani allassimavoq.
Najugaqartut 2020-mi aqqaneq-marluusimapput, sulisullu 46-llutik - taakkunani pisortat paarlatsillu ilaallutik.
- Nakkutilliinermik ingerlatsiviup nalilerpaa sulisut ulloq unnuarlu angerlarsimaffittut neqeroorut najugaqartullu paaqqutarinerissaannut tunngatillugu pisariaqartunik piginnaasaqartut.
Annertuumik innarluuteqartut
Ulloq unnuarlu angerlarsimaffik Ivaaraq Qaqortumiittoq meeqqanik inersimasunillu timikkut tarnikkullu annertuumik innarluuteqartunut angerlarsimaffiuvoq.
Nakkutilliisut 2020-mi nalunaarutiminni inerniliussaraat ulloq unnuarlu angerlarsimaffiup najugaqartut peqqissusaat, tamatumani aamma kinguaassiornermut tunngatillugu inuunerat, pitsaasumik ukkatarigaat. Nalunaarusiaq naapertorlugu najugaqartut atoqateqartanngillat, najugaqartulli arnat ilaat, naartunaveersaataanera patsisiginngikkaluarlugu, p-pilletortinneqartartut.
Namminersorlutik Oqartussat Nakkutilliinermik Ingerlatsiviata Ivaaraq innersuussuteqarfigaa kinguaassiornermut tunngasumik politikkip nutarternerata naammassineqarnissaa.
Ombudsmandimit akuerineqartut
Ombudsmandip Ivaaraq 2017-imi nakkutilliiartorfigereerlugu sakkortuumik isornartorsiorpaa. Sulisut, pingaartumik sapaatip akunnerata naanerani amigartarnerat pissutigalugu, najugaqartut perusuersartussaatillugit uffarnermilu ikiorneqarnissaat sammisassaqartinniarnerilu ikiorneqartarnissaat naammassineqarsinnaasarsimanngilaq.
Ombudsmandilli 2018-imi nakkutilliiartoqqikkami nalilerpaa ajornartorsiut aaqqiivigineqarsimasoq, sulisullu aalajaattut najugaqartunik sullissilluartut.
Nakkutilliinermik ingerlatsiviup 2020-mi aamma nalilerpaa najugaqartunik eqqiluisaartitsineq pitsaasumik ingerlasoq.