Nakkutilliisoqarfimmit kommunalbestyrelsi oqaluuserisassatut itigartinneqarsimasumik suliaqaqquneqartoq
Inissaqartitsiniarnermi suliami politikkikkut akisussaaffiliisoqarnissaanik siunnersuut kommunalbestyrelsimi sulianeqassasoq, Nakkutilliisoqarfimmit aalajangiunneqarsimavoq.
Kommuneqarfik Sermersooq Nakkutilliisoqarfimmi ajorsartinneqaqqippoq.
Nakkutilliisoqarfimmiut sapaatip-akunnerata siuliani ataatsimiissimapput, ataatsiminnermilu aalajangiunneqarsimavoq, Kommuneqarfik Sermersuumi borgmesterinngorlaaq kommunalbestyrelsip ataatsimiinnissaata tulliani inissaqartitsiniarnermi suliamik oqaluuserisassanngortitsissasoq. Namminersorlutik Oqartussanit tusagassiorfitsigut nalunaaruteqarluni ilisimatitsissutigineqarpoq.
Nakkutilliisut tamatuma saniatigut kommunimi kommunalbestyrelsimut piumasaraat oqaluuserisassanut missingiummi pineqartup ilanngunneqarnissaanik akuersissasut kiisalu oqaluuserisassanngortinneqartoq piviusumik suliareqqullugu.
Oqaluuserisassatut siunnersuut kommunalbestyrelsimi amerlanerussuteqartunit ukioq manna siusinnerusukkut itigartitsissutigineqarsimavoq. Namminersorlutillu Oqartussanit oqaluuserisassanngortinneqartumik oqaluuserinnissasut taamanikkulli piumasarineqarsimavoq, taamanikkut nalilerneqarsimammat oqaluuserisassanngortitamik itigartitsisimaneq malittarisassanut uniuuttoq.
Oqaluuseriassanngortinneqassasoq
Borgmesteriusimasup Charlotte Ludvigsenip (IA) oqaatigisimavaa, suliap Nakkutilliisoqarfimmi suliarineqarnissaa angorusussimallugu:
- Nakkutilliisunut isumaqataanngilagut, naliliisimanermullu eqqartuussissuserisup allakkiaa tapersiisoq pigaarput. Taamaammat Nakkutilliisoqarfiup naliliinissaa piumasaraarput, Ludvigsen taamanikkut oqarsimavoq.
Oqaluuserisassanngortitassatut siunnersuuteqartuusimavoq Inga Dora G. Markussen, siunnersuutaanilu pineqarpoq, kommunip namminersortunit inissianik 400-t missaanniittunik attartornissamik isumaqatigiissuteqarsimanerani politikkikkut akisussaaffiliisoqarnissaa. Inissiat kommunip sulisunut innuttaasunullu amigartooruteqartumik attartorteqqittarsimavai, Nakkutilliisullu tamanna akuerisimanngilaat kommunimullu attartortitseqqiisarnerup unitsinneqarnissaa piumasarisimallugu.
- Suliami matumani ineqarnermut politikkip ingerlanneqarsimaneranut akisussaaffimmik inissiisoqartariaqarpoq. Siunnersuutimmalu kommunalbestyrelsimi oqaluuserineqannginnera uggoraara, Inga Dora G. Markussen oqaluuserisassanngortitaq februaarip qaammataani itigartinneqarmat oqarpoq.
Inga Dora: Suliap oqaluuserineqarnissaa suli naleqquppoq
Charlotte Ludvigsen akerlianik isumaqarpoq, kommunalbestyrelsip arlaannik pisuutitsinissaq suliassarinngikkaa.
Inga Dora G. Markussenip Sermitsiaq.AG-mut oqaatigaa, Charlotte Ludvigsen borgsteritut tunuareeraluartoq, siunnersuutip oqaluuserineqarnissaa suli naleqquttoq isumaqarluni:
- Isumaqarpunga maanna inissiffigisimasatsinnut qanoq pisimanerluta oqaluuserineqartariaqartoq. Aalajangiiffigisimasatsinnut akisussaasuusariaqarpugut ilinniutigalugulu. Suli isumaqarpunga suliat ilungersunartuummata nassueruteqarnissaq akisussaaffiliinissarlu inissaminiittut. Siunnersuuteqarnermi siunertarineqarsimavoq, suliap ingerlanneqarsimanerata iternga tikillugu misissuisoqarnissaa, kommunittalu siumut qanoq ingerlanneqarnissaanik oqaluuserinninnissamut periarfissinneqarluta, taanna oqarpoq.
Kommuneqarfik Sermersuumit Sermitsiaq.AG-mut oqaatigineqarpoq, oqaluuserisassanngortitaq kommunalbestyrelsip tullianik ataatsimiinnissaanut ilanngunneqarniartoq, aggustimi ataatsimiinneq pissasoq ilimagineqarpoq.