Nakkutilliisoqarfik: Kommuni arlalinnik peqqussuteqarfigineqarpoq
Tulleriissaartumik suleriuseqanngitsumik allakkianillu amigaateqarnerup kingunerisaanik Kommune Kujallermi inunnik isumaginnittoqarfiup iluani inuit innarluutilinnik sullissiniarnermi suliat ataasiakkaat misissuiffiginiarneri pisariuvoq. Nakkutilliisoqarfik taama naliliisoq kommunimut pingasunik pisussaaffiliisumik peqqussuteqarpoq 28-nillu najoqqutarineqarsinnaasunik piumasaqaateqarluni.
Inuit innarluuteqartut tapersersorneqarnissaat pillugu maleruagassanik Kommune Kujalliup ingerlatsinera pillugu nakkutilliiartortut pisussaaffiliisumik peqqussutinik pingasunik aamma najoqqutarineqarsinnaasunik piumasaqaatinik 28-nik tunivaa. Namminersorlutik Oqartussat nakkutilliiartortui kommuni ukiakkut 2021-mi tikeraareersullu tamanna pivoq.
Nakkutilliiartortut naliliipput sulianik sullissineq ataatsimut isigalugu tulleriissaartumik suleriuseqanngitsumik ingerlanneqartartoq. Isumaginnittoqarfiullu inuit innarluuteqartunut tapersersuinissamut aalajangiineri ilaat allakkiatigut takussutissaqanngitsut.
- Suliani ataasiakkaani takussaavoq allakkiamik suliamut ikisiinnartoqartarsimasoq/toqqorsisoqaannartarsimasoq, suliamili takussutissaqarnani allakkiaq pillugu sunik isummertoqarsimanersoq imaluunniit allakkiaq malersoqqinneqartarsimanngitsoq. Tassunga ilanngullugu suliani arlalinni takussaavoq innarluutilinnut inatsit naapertorlugu aalajangiisoqartarsimasoq takussutissartaqanngitsumilli, soorlu aalajangiineq allaganngorlugu pineqartumut tunniunneqarsimanersoq takussutissaqarneq ajorluni, nakkutilliaartortut nalunaarusiamut 44-nik qupperneqartumut eqikkaanerminni allapput.
Pisussaaffiliisumik peqqussutit
Kommune Kujallermi meeqqat inersimasullu innarluuteqartut pillugit suliat 24-it nakkutilliiartortut misissuiffigisimavaat.
Qaqortoq:
- Meeqqat innarluuteqartut pillugit suliat pingasut
- Inersimasut innarluuteqartut suliat arfineq-pingasut
Nanortalik:
- Meeqqat innarluuteqartut pillugit suliat marluk
- Inersimasut innarluuteqartut pillugit suliat arfinillit
Narsaq:
- Meeqqat innarluuteqartut pillugit suliat marluk
- Inersimasut innarluuteqartut suliat pingasut
Suliani pingasuni kommunalbestyrelse pisussaaffiliisumik peqquneqarpoq suliat pillugit aaqqeeqqullugu. Suliani inersimasut marluk aamma meeraq ataaseq innarluuteqartut pineqarput.
Suliani marlunni kommuni qulaajaanermik aallartitsissasoq kiisalu iliuusissamut pilersaarummik suliaqassasoq Nakkutilliinermik Ingerlatsiviup pisussaaffiliisumik peqqussutigaa.
- Suliat pingajuanni kommuni isumaginninnikkut misissuinermik aallartitsissasoq, ilanngulluguttaaq meeqqap tarnikkut nappaateqarsinnaanera pillugu qulaajaassasoq, tassungalu ilanngullugu meeqqap innarluutaanut tunngatinneqartumik iliuusissamut pilersaarummik suliaqassasoq Nakkutilliinermik Ingerlatsiviup kommuni peqqussuteqarfigaa.
Inatsit pillugu ilisimasanik amigaateqarneq
Inuit innarluuteqartut pillugit tapersersuinissamut suliat naammaginannginneri nakkutilliiartortut isornartorsiorpaat, suliani takuneqarsinnaammat inuit innarluuteqartut kommunimit ilisimaneqarluartut.
Nakkutilliiartortulli maluginiarpaat kommunimi inunnik isumaginnittoqarfimmi sullissisut inuit innarluutillit tapersersorneqarnissaannut inatsik nutaamik ilisimasakinnerat.
- Nakkutilliinermik Ingerlatsivik naliliivoq, allaganngorlugu aalajangiussaasimasut takutikkaat kommunip innarluutilinnut inatsimmi aalajangersakkat sorliit sulianik sullissinermini tunngavissaanersut ilisimasaqarfiginngikkai. Tassa imaappoq, aalajangiinerni arlalinni piginnaatitsissutinut aalajangersakkat innersuussutigineqartarsimallutik. Tassa allaganngorlugu aalajangiinerit takutippaat, eqqumaffigineqartarsimanngitsoq inatsisit sorliit atuuttuunersut kommunip sullissinermini tunngavigisassarinerai, Nkkutilliinermik Ingerlatsivik allappoq.
Inuit innarluuteqartut tapersersorneqarnissaanut sullissinermut tunngatillugu kommuni 28-nik najoqqutarineqarsinnaasunik piumasaqarfigineqarportaaq.