Nakkutilliisartussat nutaat pingasut qernertanik qilalugarniartarneq ukkatarissavaat

Nakkutilliisartussanik pingasunik Kitaani aaffanniartarnermik, qernertanik qaqortanillu qilalugarniartarnermik malinnaasussannik aappaagu atorfinitsitsisoqarnissaa pilersaarutigineqarpoq, miluumasut imarmiut pillugit ataatsimiititaliaq nakkutilliisussanik nammineq toqqaaniartoq ilisimatitsivoq.

Ataatsimiititaliaq Kitaani "piniartarnermik" ukiuni arlalinni nakkutilliisarsimanngilaq, tamannali ataatsimiititaliap maanna allanngortinniarpaa. Nakkutilliisunillu paasissutissat NAMMCO-p uumasut nungutaannginnissaat qulakkeerniarlugu nungusaataanngitsumik piniartoqartarnissaanik suliaqarnermini atortassavair.

NAMMCO Kalaallit Nunaannit, Savalimmiunit, Islandimit Norgemillu ilaasortaatitaqarpoq, suliniaqatigiiffillu martsip 22-aniit 25-anut 28-ssaat ataatsimiissimavoq, tassani Canadami, Danmarkimi, Japanimi, Ruslandimi USA-milu naalakkersuisut aalajangeeqataasinnaanngitsutut peqataasimapput.

Tunumi piniartut saqqummiussisimasut

Ataatsimiinnermi Tunumi piniartut ukiuni qulikkuutaani qilalukkat qernertat pillugi ilisimasaqarfigilersimasatik tunngavigalugit saqqummiussipput.

NAMMCO-mit tusagassiorfinnut nalunaaruteqarnermi oqaatigineqarpoq, Tunumi qilalukkat qernertat ataavartinneqarnissaat pillugit ilisimatuut piniartullu assingiinngitsunik isumaqartut saqqummiussinermi paasinarsisoq.

Suliniaqatigiiffimmit erseqqissaatigineqarpoq, ilisimasat pitsaanerpaat tunngavigalugit siunnersuisoqartassasoq, tamatumanilu piniartut ilisimatuullu ilisimasaat oqimaaqatigiissillugit atorneqartarnissaat pisariaqartoq.

- Suliaqaqqinnermi taamaammat piniartut atuisullu ilisimasaasa ilanngunneqarnerusarnissaat sulissutigineqassaaq, tassa ilisimatusarnerup pitsaanerpaamik ineriartortinneqarnissaa anguniarlugu, NAMMCO-mi ilisimatitsissutigineqarpoq.