Skip to main content

Nakkutilliinermit nalunaarusiaq: Nuummi meeqqat pisariaqartitsinerpaat sumiginnarneqartarput

Kommuneqarfik Sermersuup meeqqanik inissiisarnerni aamma angajoqqaarsianik Nuummi akuersissuteqartarnermik aqutsinera ''amigarpoq aamma suliani naammaginartumik iliuuseqarnermut piumasaqaatinut tunngatillugu illersorneqarsinnaanngilaq''.

Isumaginninnermut naalakkersuisoqarfimmit nakkutilliinermut nalunaarusiami saqqummiunneqaqqammertumi, Sermitsiaq.AG-p paasisaqarfigisaani tamanna inerniliunneqarpoq.

Amigartumik uppernarsaasarneq
Ukiup affaata ingerlanerani nakkutilliinermik ingerlatsiviup Ittoqqortoormiit, Paamiut aamma Nuuk tikeraarpaat. Misissuinerit nalunaarusiamik 38-nik quppernilimmik inerneqarput, oqartussallu suliassartik naammaginanngitsumik ingerlassimagaat tamatuma takutippaa.

Nakkutilliinermik ingerlatsiviup Nuummi paasisimavaa:

  • taamaallaat suliat 30 procentiini angerlarsimaffiup avataanut inissiinermut tunngaviusut uppernarsaasersukkat
  • Iliuusissanik pilersaarutit, tamatumunnga ilanngullugit suliat 50 procentiinik amerlanerusuni iliuusissanik pilersaarutit nutartikkat

''Isumaginninnermut ingerlatsinermi amigartorujussuaq''
- Nakkutilliinermik Ingerlatsivik isumaqarpoq Nuummi isumaginninnermik ingerlatsivik meeqqanut inuusuttunullu tunngasut iluanni imaannaanngitsunik amigaateqartoq, naak annertuunik nukissaqaraluarluni, sulisullu ilinniagaqartuugaluartut, nalunaarusiami tamanna allaqqavoq, unalu ilanngunneqarpoq:

- Amigaataapput aqutsineq aamma nammineq sulianik nakkutilliineq, taamaammallu sulineq aaqqissugaanngilaq, inuit ataasiakkaat sulineralugu suliallu ingerlanerat pisariaqartumik aqutarineqarnani.

Nakkutilliinermik ingerlatsiviup suliat ataasiakkaaginnaat inunnik isumaginnittoqarfimmit qaqissimavaat, kisianni paasineqarpoq suliat nalaatsornikkut toqqakkat arlaqartut ernumanarluinnartut, taakkunanilu pineqarlutik meeqqat, ''kommunip suliamik suliaqarnera aamma/imaluunniit suliaqannginnera pissutigalugu pisortanit sumiginnagaasimasut''.

Ernumanarnera
Nakkutilliinermik ingerlatsiviup kommunit sumiginnaanerat ima oqaaseqarfigaa:

- Pisortanit sumiginnaaneq pilerpoq, meeqqat kommunimit ilisimaneqartumik inuunerat ulorianartorsiorsimammat (ulorianartorsiormat), siunissami inuunissaat aserorneqarsinnaasimammat, assersuutigalugu annertuumik timikkut annersagaasarsimallutik kinguaassiuutitigullu innarligaallutik – kommunip unitsinngisaanik imaluunniit sunniuteqarluartumik unitseriarsimanngisaanik

''Nikallornartoq''
Kommunip aqutsisoqarfiani Tasiilami meeqqat sumiginnakkat aamma kinguaassiutitigut atornerlunneqartarsimasut pillugit suliat unammillernartut ilisimaneqarpoq. Nakkutilliinermik ingerlatsiviup maanna illoqarfiit pingaarnersaanni pissutsit ''illersorneqarsinnaanngitsut'' paasisimammagu kommunimi pisortaagallartup Lars Møller-Sørensenip tupaallaatigaa.

- Suliassaqarfimmut nukissarpassuit atorneqartut iluatsissimanngimmata nikallornarpoq, Lars Møller-Sørensen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER