Nakkutilliiartorsimaneq: Atuarfik akunnerninni ikippallaani ilinniartitsisarsimasoq

Kommuneqarfik Sermersuumi Meeqqanut Atuarfeqarnermullu Ingerlatsiviup nakkutilliiartornermini Atuarfik Hans Lyngemi pissutsit arlallit aaqqiiffigineqartariaqartut qulaajaaffigisimavai, Aningaasaqarnermut Inuussutissarsiornermullu Ataatismiititamut februaarip 18-iani ataatsimiittussamut ilisimatitsissummi tamanna atuarneqarsinnaavoq.

Ukiumut atuartitsiviusussamut 2019/20-mut atuarfimmi aqutsisut inatsit malillugu minnerpaamik atuartitsivissaasunik pilersaarusiorsinnaasimanngillat.

Atuartitsinissamut piffissaq minnerpaaffiliussaq

Ingerlatsivimmi pisortap Lone Nukaaraq Møllerip suliassamik saqqummiussissummi erseqqissaassutigaa pingaartumik ukiut sisamaanni atuartitsinissamut piffissaq qanoq minnerpaaffilerneqarsimanersoq:

Ukiut sisamaanni atuartsinermut: akunnerit 890-it

Ukiut tallimaanni atuartitsinermut: akunnerit 920-t

Ukiut qulingiluaanni atuartitsinermut: akunnerit 910-t

Ukiut qulinganni atuartitsinermut: akunnerit 920-t

Atuarfik piffissaq ilinniartitsiviusussaq pillugu pilersaarusioqquneqarsimavoq, inatsisip malinneqarnissaa anguniarlugu. Ingerlatsivimmilu pisortap oqaatigaam tamanna qulakkeerneqassasoq ”ukioqatigiikkuutaani fagini nalinginnaasunit allaanerusumik ilinniartitsinerit qimerluualaarnerisigut kiisalu ukioqatigiikkuutaat sapaatip-akunnerani ilinniartitsiffigineqarnerisa ingerlaavartumik malinnaaffiginerisigut”.

Ingerlatsiviup atuarfeqarnermut immikkoortortaata malinnaaffiginiarpaa, inatsimmik unioqutitsisoqannginnissaa anguniarlugu atuarfik siunissami ukioqatigiikkuttaat assigiinngitsut ilinniartinneqarnissaannut pilersaarusiortassarnersoq.

Pissutsit allat

Nkkutilliiartortoqarnerani pissutsit allat aamma paasineqarput:

Piffissami matumani atuartut atuanngitsoortarnerannut atatillugu ilitsersuuteqanngilaq

Trin 1-imi immikkut saniatigut immikkoortumi aqutsisumik pilersitsisoqarsimavoq, tamannalu piffissaq suliffiusussaq pillugu isumaqatigiissummut akerliulluni.

Elevrådimut attaveqaatissamik amigaateqarneq

Ilinniartitsisinnaaneq eqqarsaatigalugu kommunimi atuarfeqarnermut immikkoortortaqarfiup nalilerpaa atuarfik ingerlalluartoq aamma trinnikkuutaani inernerit nuna tamakkerlugu agguaqatigiissitsineq eqqarsaatigalugu inissisimalluartut, taamaattorli kalaallisut allattariarsorneq aamma matematik pinnagit aamma soraarummeertussat nuna tamakkerlugu agguaqatigiissitsinermi kalaallisut angusarissaannginnerusarput.

- Taamaattumik atuarfimmi aqutsisunit ilinniartitsisut linjefagillit taakkualu atorneqarnissaat annerusumik aallukkusunneqarput, ilisimatitsissummi allassimavoq.

Atuarfik 495-inik atuartoqarpoq kiisalu atuartut tikeraartut marluullutik, taakkualu klassinut 22-nut kiisalu SP-klassimut ataatsimut agguataarsimasuupput.

Inissaqarniarneq unammillernartoq

Atuarfik 1.-7. klassinut atuarfissanngorlugu sanaajummat atuartunut inissaqartitsiniarneq annertuumik unammillernartuuvoq. Ilinniartitsisut ilaannit oqaatigineqartarpoq, klassimi atuartut amerlavallaartut pissutigalugit nungullartarlutik, pisuni amerlasuuni klassimi ataatsimi atuartut 26-t angullugit amerlassuseqalertarmata.

- . Klassini atuartut amerlavallaartarneri aamma nassuiaataasinnaavoq ilinniartitsisut ukiuni kingullerni nikerarnerannut, ilinniartitsisut allanut qinnuteqartarlutik, aningaasaqarnermut ataatsimiititamut ilisimatitsissummi allassimavoq.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...