Qaasuitsup Kommunia

Najukkamut uppernarsaatit kommunit iluanaarfigerujussuartarpaat

Uppernarsaammik piniaraanni 60 koruuninik akeqarpoq.

Ilulissat Lufthavn
Disko Linemik angalasut kinguaattoornerminni aningaasartuutitik matussuserniarunikkit uppernarsaammik takutitsisussaapput.

Angalatilluni kinguaattoornermut atatillugu aningaasartuutinut akiliunneqassagaanni, ukiumit nutaamit najukkamut uppernarsaammik Disko Linemut takutitsinissaq pisariaqalernikuuvoq.

Innuttaasut nemID atorlugu uppernarsaammik pissarsisinnaanngitsut kommunimut piniarsinnaapput. Kisianni 60 koruuninik akeqarpoq.

75.000-nik sinneqartooruteqartut
Qaasuitsup Kommunia innuttaasunut nemID-eqanngitsunut imaluunniit innuttaasunut nammineq najukkamik uppernarsaammik pissarsisinnaanngitsunut tunniussinerminni 75.000 koruuninik iluanaaruteqarpoq.

Kommunip naatsorsuinerata tamanna takutippaa.

Aamma atuaruk: Siunnersuut: Najugaqarnermut uppernarsaat akeerulli

- Angallannikkut sullissinerup ajorteriarnerata kingorna aamma innuttaasut aningaasartussasut piumasarineqarpoq, akissaliinnaanngillat innuttaasugut tamarmik taamaammat assingiimmik periarfissittariaqarpagut innuttaasugut, Kristian Jeremiassen siunnersuuteqarpoq.

Kommuni piffissamik qaammatit pingasut missaani innuttaasut tamarmik akeqanngitsumik najukkamut uppernarsaammik aallersinnaanngorlugit periarfissiisoqartariaqartoq, taanna isumaqarpoq.

Minutsinik qulinik sivisussuseqartoq
Sulisup uppernarsaammik suliaqarnera minutsit qulit missaanni sivisussuseqartartoq kommunip nalilerpaa, taamaalillunilu uppernarsaatinik tunniussinermi ukiumut tunniusinermi akissarsianut 30.000 koruunit missaanni aningaasartuutigineqartarput.

2016-imi Qaasuitsup Kommuniani najukkamut uppernarsaatinik 1.765-inik tunniussisoqarpoq, kommunilu taamaammat 105.900 koruuninik isertitaqarpoq.

Jeremiassenip siunnersuutaa akuerineqassanersoq aningaasaqarnermut ataatsimiititaliap aalajangissavaa.

Powered by Labrador CMS