Najukkami qinigaq: Kiffartuussinissamut isumaqatigiissutit annertuumik ajornerulerput

- Qasigiannguit, Qeqertarsuaq, Kangaatsiaq nunaqarfiilu nipaatsumik arriittumillu inuerussarneqarput.

Qaasuitsup Kommuniani kommunalbestyrelsimut ilaasortaq, Kristian Jeremiassen (S), angallannermi kiffartuussinissamut isumaqatigiissutit nutaat takoreerlugit taama oqarpoq.

Kiffartuussinissamut isumaqatigiissutit sisamnngornermi Inatsisartut Aningaasaqarnermut aamma Akileraartarnermut Ataatsimiititaliaani marlunngornermi akuerineqarput, januaarillu aallaqqaataani atuutilissapput, tamatumalu kingunerissavaa Qeqertarsuup Tunuani ukioq naallugu umiarsuarmik angalasalerneq.

Atuaruk: Air Greenlandip atorfiit 45-t peertariaqarpai

Unnuinerit arlallit
- Illoqarfinnut allanut angalaniarneq januaarip aallaqqaataani ajornarnerulissaaq, angalaniarutta ulluni arlalinni unnueqqaartariaqalissaagut. Angalaneq akisoorujussuuvoq, sulilu akisunerulissaaq, taanna tusagassiuutinut nalunaarummi allappoq.

Kiffartuussinissamut isumaqatigiissut atuutilerpat, Disko Line qulimiguulinnik pisariaqartillugu attartortassaaq. Tamanna Qasigiannguani, Qeqertarsuarmi, Kangaatsiamilu innuttaasunut sakkortuumik eqquissaaq, Kristian Jeremiassen isumaqarpoq.

Atuaruk: Ilaasut timmisartorlutillu umiarsuartassapput

Takornariaqarneq eqqorneqassasoq
- Illoqarfinni taakkunani ineriartorneq takornariaqarnerlu sakkortuumik eqqorneqassapput. Isumaqatigiissutit ajorseriarujussuarput, tassami ukiukkut umiarsuartoqarsinnaanngilaq, mallernikkaasarnera pissutigalugu. Isumaqatiginninniarnermi tamakku atukkat isiginiarneqannginneri eqqumiippoq, politikeri oqarpoq.

Novembarip aallaqqaataata aamma maajip qeqqata tungaanut qulimiguulimmik timmisartuussisoqartariaqartoq, taanna isumaqarpoq.

- Ajunngilaq maajip qiteqqunnerani timmisartoqartarunnaarutta, aasaq kaajallallugu timmisartoqartanissarput pisariaqanngilaq. Kisianni ukiukkut timmisartuussisoqartariaqaraluarpoq, Kristian Jeremiassen oqarpoq.

Atuaruk: Kiffartuussinissamut isumaqatigiissutit maanna inissipput