Peqqinneq

Najukkami iliuuseqarnerup kukkusumik nakorsarneqarneq pinngitsoortissavaa

Kukkunerit nalunaarsorneqartannginnerat peqqinnissaqarfiup ajornartorsiutaannginnerarpaa

Nunatsinni peqqinnissaqarfimmi kukkusumik nakorsarsinerit, kukkunerit siunertaanngitsumik sulianik taaneqartartut. KNR ungasinngitsukkut taama oqaluttuarpoq.

Kukkunerit ilikkagaqarfigineqarnissaannut nalunaarsuinerit taamaattut Danmarkimi sakkut pingaartuupput.

Kisianni eqqissigitsi, kukkunerit ilikkagaqarfigisarpagut, allatut ilinniarfigiinnartarpagut, peqqissutsimut naalakkersuisoqarfik taama oqariartuuteqarpoq.

- Siunertaanngitsumik kukkunernut malitseqartitsinissaq taamaalillunilu napparsimasunik sullissinermi kukkunernik pitsaaliuineq Peqqinnissaqarfimmit suliniutigineqarpoq, peqqissutsimut naalakkersuisoq Agathe Fontain (IA), tusagassiuutinut nalunaarummi neriorsuivoq.

Immikkoortuni suleqatigiissitat kukkunernik misissuisarput
Immikkoortuni aqutsisut siunertaqanngitsumik kukkunernik pisoqarsimappat malitseqartitsisarput. Suleqatigiissitanik qanoq allannguisoqarnissaanik misissuisussanik pilersitsisoqartarpoq, taamaalilluni kukkunerit siunissami pinngitsoortinneqarniassammata.

- Assersuutigalugu Danmarkimisut nuna tamakkerlugu siunertaanngitsumik kukkunerit amerlassusaasa nalunaarsorsimaffiannik, peqanngilagut, immikkoortunili taama pisoqaqqinnginnissaa qulakkeerniarlugu misilittakkanut pitsaaliuinermullu tunngatillugu sulianut, pingaarnertut siunertaasarialittut oqaatigisariaqartumik, pisut ataasiakkaat sulissutigineqartarput, Nakorsat qullersaat Anne Marie Ulrik tusagassiuutinut nalunaarummi allappoq.

Kukkunerit taamaattut ass. sulisilluni akornusersorneqarnikkut napparsimasup nakorsaatitugassaanik kukkusunik piareersisoqarsinnaavoq, inuttaanulli tunniutsinnagit paasineqarneranik kinguneqarsinnaalluni.

Napparsimasorluunniit alla misissortinnissaanut ingerlanneqarsinnaavoq aqqa inuuialu eqqortumik apeqqutigineqanngippata, misissuinissarli aallartilersoq tamanna paasineqarluni.

Powered by Labrador CMS