Najukkami akisussaassuseqarnikkut Tasiilami suliniutit nukittorsarneqassasut
Kommunip Tasiilami sulisut nammineq aalajangiisarnissaannut piginnaatinnerulersimavai. Meeqqat inuusuttullu sukkanerusumik ikiorneqartalernissaannut tamanna periarfisseeqataassaaq
Tasiilami meeqqanut ilaqutariinnullu tunngasutigut suliaqarfimmi pisortaq sullissisullu Nuummut saaffiginneqqaaratik namminneq aalajangiissarnissamut piginnaatinneqalersimapput.
Siunertaavoq meeqqat pillugit suliarpassuit oqimaatsut sunniuteqarnerusumik suliarineqartalernissaat. Tamanna meeqqat inuusuttullu atugarliortut pillugit politikkimi, Kommuneqarfik Sermersuumi Meeqqanut Ilaqutariinnullu Ataatsimiititap ullumi ataatsimiinnermi sammisassaani takuneqarsinnaavoq.
- Aamma aaqqissuussaq Tasiilami atuutsinneqalersimavoq, tassa najukkami sulisut namminneq aalajangiisinnaanngortinneqarsimapput. Tassa allaffissornikkut aalajangeeriaatsit ajornaannerulersinneqarlutillu eqaannerulersinneqarsimapput, politikkimi tamanna allassimavoq.
- Najukkami suliassanik naammassinnittarnissaq aamma Tunumi meeqqanut ilaqutariinnullu tunngasutigut susassaqarfimmik ineriartortitsinissaq qulakkeerniarlugit, Tasiilami Oqartussaaffik aamma Pitsaaliuineq Katsorsaasarnerlu ataasiinnarmik pisortaqartinneqalerput.
Suliassarpassuit
Ataatsimut isigalugit kommunimi sullissisut namminneq aalajangiinissamut piginnaatinneqarnerulersimapput.
- Meeqqanut Ilaqutariinnullu Ingerlatsivimmi piginnaasanik agguaassisarnermut pilersaarutip ajornaannerulersinneqarneratigut, sullissisut sullissinerminnut atatillugu annertunerusumik piginnaatinneqalerput.
Tasiilami sullissisarnerup eqaannerunissaa pisariaqartinneqangaatsiarsimavoq. Soorlu piviusulersaarutip 'Byen hvor børn forsvinder' takutikkaa, meeqqanik sumiginnaasimanermik, persuttaasimanermik innarliisimanermilluunniit pasitsaassaqarermik suliassat amerliartuinnavissimapput.
Siorna aasakkut pisortap Martha Lund Olsenip nassuerutigaa, isumaginninnikkut misissuinerit suli kinguaattoorfioqisut. Nalunaarutillli maanna sukkanerusumik qisuariarfigineqartalersimapput.
Politiit, Peqqinnissaqarfiup kommunillu suleqatigiinnerat
Filmimi piviusulersaarummi takutinneqartut assigalugit, oqartussat assigiinngitsut akornanni assigiinngitsutigut nalunaarusiorniarnerit aamma kinguaattoorfiungaatsiartarput. Tassunga atatillugu aamma iliuuseqartoqarpoq.
- Kommuneqarfik Sermersuup, Kalaallit Nunaanni Politiit Namminersorlutillu Oqartussat susassaqarfiisa Tasiilami suleqatigiiffissaat pilersinneqarsimavoq. Suleqatigiinnissaq arlalinnik siunerfittalik. Ilaatigut Tasiilami meeqqat kinguaassiuutitigut innarlerneqarsinnaanerat qanoq pinaveersaartinneqarsinnaanersoq, innarlerneqartarnerat qanoq annikillisinneqarsinnaanersoq innarlerneqarsimasullu qanoq katsorsarneqartarnissaat pillugu ataqatigiissaakkamik suliniuteqartoqalersimavoq.
- Susassaqarfiit akimorlugit, peqataatitsisumik sivisuumillu suliniuteqartarneq inuttut atukkanik ataavartumik allangueqataasinnaavoq. Suliniuteqarnermi Tasiilami pissutsit tunngaviusimapput, ilikkakkalli misilittagarilerneqartullu kommunimi sumiiffinni allani aamma atorneqarsinnaapput.
Tasiilami meeqqat 140-t angerlarsimaffiup avataanut inissinneqarsimaput. Nuuk qulingiluariaammik anginerusoq assersuutigissagaanni, tassani meeqqat 200-t angerlarsimaffiup avataanut inissinneqarsimallutik.