Najoqqutassiaq pinngortitamik illersueqataassaaq

Suliniut nutaaq aqqutigalugu Kalaallit Nunaanni pinngortitaq silaannarlu pillugit ilisimasanik katersisoqarlunilu siammarterisoqassaaq, najoqqutassiamik saqqummersitsinikkut nittartakkatigullu.

Najoqqutassiami nittartakkamilu Kalaallit Nunaanni pinngortitaq pillugu piviusut nutaanerpaat najoqqutassiami nittartakkamilu imaritinneqassapput.

Bo Normander suliniummik aqutsisuuvoq najoqqutassiamillu nutaamik pingaarnertut atuakkiortuulluni, taannalu isumaqarpoq pinngortitaq pillugu ilisimasaqarnerulerneq pinngortitamik illersueqataallunilu ataavartitsissasoq:

Ilisimasanik siammarterinissaq pingaaruteqartoq

- Kalaallit Nunaanni inuiaqatigit ineriartupiloorput, pingaaruteqarporlu pinngortitaq isumalluutinillu nungusaataanngitsumik atuineq eqqarsaatigalugit tamatuma pinissaa. Suliniut aqqutigalugu ilisimasat paasisaqarfigineqarnissaat ilisimasanillu nutaanik paasisaqarnissaq.

Suliniuteqartut:

NaturTanken, Pinngortitaleriffik, Visit Greenland, Gyldendal il. il.. Suliniut ukunannga tapiiffigineqarsimavoq, 15. Juni Fonden, Aage V. Jensens Fond, Bestles Fond, Brugseni (KNB), Disko Line, Blue Ice Explorer, World of Greenland aamma Hotel Arctic.

- Uannut pingaaruteqarpoq, Kalaallit Nunaanni pinngortitap oqaluttuarineqarnissaa, tassa kalaallinut takornarianullu pinngortitap qanoq immikkuullaritsiginera paasineqarsinnaanngorlugu pingaartinneqarsinnaanngorlugulu, Bo Normander Sermitsiaq.AG-mut oqarpoq.

Namminersorlutik Oqartussat suliffeqarfiutaarta Visit Greenlandip suliniut tapersersorpaa, ilaatigut pinngortitaq pingaarnertut pissutaasarmat takornariat Kalaallit Nunaannukartarnerannut, Visit Greenlandimi pisortaq Julia Pars oqaluttuarpoq:

Tikeraanut ilisimasassaq pingaarutilik

- Pinngortitaq pillugu ilisimasat aamma silaannaap allanngoriartorneranit nunap qanoq sunnerneqartarnera pillugu ilisimasat tikeraartorisartakkatsinnut ilisimatitsissutigissallugit pingaaruteqarluinnarput. Kalaallit Nunaannut takornariartartut amerliartornissaat eqqarsaatigalugu, takornariartitsisartut akisussaaffigaat, pinngortitaq avatangiisillu eqqarsaatigalugit imminut napatissinnaasumik takornariartitsisarnerup ineriartortinneqarnissaa, aamma nunami pitsaasumik ineriartortitsisoqarnissaa, Julia Pars oqarpoq.

Bo Normander naapertorlugu atortut nunami ilinniarnertuunngorniarfinni ilinniartitsissutitut atorneqarsinnaapput, soorlu aamma neriuutigigaa, Kalaallit Nunaanni innuttaasut takornariallu najoqqutassiamik tigusilluarumaartut.

Atuagaq nittartagarlu 2021-mi upernaakkut saqqummiunneqassasut naatsorsuutigineqarpoq.