assammik arsaanneq
Najaaja A. Lyberth siulersortaassaaq
Nunanut allanut unammisartunut sungiusaasup, unammisartunut sinniisuusussaq siulersorti toqqarpaa.
Assammik arsaattartut nunanut allanut unammisartuisa sungiusaasuata Johannes Grothip, arnat assammik arsarlutik nunanut allanut unammisartut siulersortissaat toqqarpaa.
24-nik ukiulik Najaaja A. Lyberth Nuummi GSS-imi unammisartoq toqqarneqarpoq, Nunatsinni assammik arsarnerup silarsuaani ilisarisimaneqartoq, meerarpassuarnullu maligassiuisoq unammisartuni aqutsisunngussaaq, Kalaallit Nunaanni Assammik Arsartartut Kattuffiannit paasissutissiinermi tamanna allaqqavoq.
- Nunanut allanut unammisartunut siulersortitut sungiusaasut toqqarsimammannga, nuannaarutigalugulu tulluusimaarutigaara. Sungiusaasut tatiginninnermik takutitsinerisa piumassuseqarnerulersippaanga, tamannalu unammisartoqatinnut ingerlateqqikkusuppara. Arnat unammisartut ineriartortinneqarnerat siunissami ukiorpassuarni peqataaffigerusuppara, Nunatta siulersortaa nutaaq oqarpoq.
Arnat nunanut allanut unammisartut Norcami anngunniunnissamut, Puerto Ricomi marsip naanerani pisussamut piareersaleruttorput. Ajugaasut siulliit pingasut akornanniissagunik, Amerikap Nunavittaani aasaru Canadami pissartanngorniunnernut anngutissapput, taannalu nunarsuarmi pissartanngorniunnernut anngunniunneruvoq.
Unammisartut sinniisuuffigissagai
Siulersortinngortoq nutaaq unammisartut avammut kiinnertoralugulu sinniisorissavaat. Unammisartut sungiusaasullu akornanni ataqatigiissaarissaaq, unammisartunillu toqqaanerni siunnersuisassalluni.
Nunanut allanut unammisartut sungiusaasuat unammisartoq pillugu nammineq tulluusimaarpoq.
Atuaruk: Assammik arsarluni pissartanngorniunnermi divisionit marluussapput
- Najaaja piukkunaatilimminngaanniit pingaarutilittut aqutsinermik annertuumik piginnaasaqartunngornikuuvoq. Unammisartoq pineqartoq Kalaallit Nunaanni sungiusaasunit kalaallinit ineriartortitaavoq. Siulersortinngornera pitsaasumik ineriartorneranut ilassutaavoq, sungiusaasoq oqarpoq.
- Toqqarneqarneralu tulluartuuvoq, aqutsinermut piginnaasami saniatigut inuusuttuaqqanut niviarsiaqqanut amerlasuunut sungiusaasuugami, minnerunngitsumillu Nunatsinni timersortartut assammik arsartarnermut pimoorussisuni annerpaat ilagimmassuk. Taamaattoq maligassiuisoq arnat assammik arsartarnerannut, Nunatsinnilu timersornermut tamanut iluaqutaasorujussuuvoq, sungiusaasoq Johannes Groth oqarpoq.