Skip to main content

Naja Rosing-Asvid - kulturimik nittarsaasartoq nutaaq

Aningaasaateqarfik Sermeq arfininngornermi ualikkut Katuami Inge Olsvig qiimasumik ilisarititsisuliullugu kulturimik nittarsaasartumik nutaamik toqqaavoq

Siorna kulturimik nittarsaasartoq Arnannguaq Gerstrøm qujassuteqarluni oqalugiarpoq, ukiullu ingerlanerani tusarnaartitsisarnerpassuit, nunanut avannarlernut Venezuelamullu angalasarnerit seqersittakkakkut angisuukkut saqqummiullugit. Arnannguaq kulturikkut nittarsaasuusimanerminik tulluusimaaqaluni qujassuteqarpoq ilaatigullu ima oqarluni:
– Siorna toqqarneqarama oqaatigaara, Kommuneqarfik Sermersooq Kulturimik nittarsaasartumik ataasiinnarmik pisinnaanngitsoq, kisiannili meeqqanik, inuusuttunik inersimasunillu 100-nik. Tupaallaatigeqaara taaguut taamak sunniuteqarluni matorpassuarnik ammaasinnaammat, Nunatsinni nunanilumi allani, eqqumiitsuliortutut, aningaasaateqarfinnut qinnuteqartartutut ilinniartitsusartutullu. Aningaasaateqarfik Sermeq, qujanarujussuaq.
Arnannguup erinarsoqatigiit Qupannavaat aamma Nuummi nipilersortartoqatigiit siulersorpai, ilaatigut quilat i fis dur tusarnaartitsissutigalugu, Arnannguup tusarnaagassiaa – kigaatsumillu nipilersoqatigiittartut erinarsoqatigiittartullu ataasiakkaarlutik tunuleriillutik, scene qimakkiartorpaat, kulturimik nittarsaassisunngortussaq inissaqartinniarlugu.

Isiginnaariat siullermik Aningaasaateqarfik Sermip 2013-imi tapersersugaanik Kimmernaq Kjeldsenimit Lisbeth Poulsenimillu ilisaritinneqartunik saqqummiiffigineqarput. Seqersitsiverujussuarmi eqqumiitsuliarpassuit kusanarluinnartut, tamatigoortut nutaaliorlunilu suliat takutinneqarput. 
Suliniutillu tapersersorneqarsimasut ilaat atuakkiornermik soqutigisalinnut tungnasoq Allatta – kalaallit inuusuttut oqaluttuaaraliaat atuffassissutigineqarput, Maaliaara aamma Miinannguaq namminneq oqaluttuaaraliaminnik atuffassillutik.

Aningaasaateqarfik Sermip siulittaasuata, borgmester Asii Chemnitz Narup 2014-imi kulturimik nittarsaassisartussaq nutaaq Naja Rosing-Asvid ilisaritimmagu pissanganeq annertusivoq.
Toqqaanermi tunngavilersuutigineqartut arlaqarput, Asii C. Narupilu ilaatigut ima oqaaseqarpoq:
Ukioq´manna eqqumiitsuliortoq tamatigoortoq soqutiginartorlu aamma eqqumiitsuliamigut nipangersimaannarsinnaanngitsoq kulturimik nittarsaassiartussatut toqqarparput. Taassuma eqqumiitsuliorneq anersaartornertulli nalinginnaatigisutut isigaa.
Eqqumiitsuliortup – oqaluttuarnermik soqutigisalerujussuaq – nunatsinni pinngortitaq kulturilu, oqaluttuat oqalualaallu inunnguutsiminik tunissutisiarai.
Naja Rosing-Asvid attortissimaqisoq nuannaaqisorlu Arnannguaq Gerstrømimit kulturimik nittarsaasartuusimasumit nangitsisunngortinneqarpoq.
Naja ilaatigut oqarpoq:
- Toqqagaanera akuererusunneriga aperineqarama tupaallattorujussuuvunga. Eqqarsarpunga, sooq uangarpiaq? 
Kisialli eqqarsaqqilaariarama aalajangerpunga, akuersaarniarlunga.
Ukiorpassuarnimi kulturimut tunngasunik suliaqartarsimavunga – eqqumiitsuliornikkut – Nuummi Nunatta Katersugaasiviani sulinikkut – meeqqanullu atuakkiara Aqipi – toornaaraq – aqqutigalugit. Illussanik titartaasartutut ilinniarsimasuuvunga. Illussanik titartaasartutut Ilinniarfimmi sanaartugassanik titartaassatillunga pinngortitaq kulturerpullu isumassarsiorfittut atortarpakka.
Ukioq manna atuartunut suliniutit saqqummerseqqikkusuppakka. Tassuunakkut avatangiisitta ilusilersorneranni kulturitta qanoq atorneqarsinnaaneranut isumassartitsisinnaanerlunga neriuutigaara.
Naja Rosing-Asvid naggataatigut eqqumiitsuliaminik takutitsivoq, sermimiit bronzemut, qassutinit, sioqqanit, timmissat meqquinik illunillu assilisanik, kusanartumillu saqqummiussinermi Miki Jacobsen guitarimik ingiuivoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER