Naja Lund: Kujataaniit aqqutit toqqaannartut qulakkeerneqartariaqarput
Narsarsuarmi mittarfiup heliportinngortinnginnerani, Qaqortumilu pilersaarutaareersunit minnerusumik mittarfiliunnginnermi, tamanna qanoq kinguneqassanersoq misissorneqartariaqartoq, Kommune Kujallermi IA-p gruppiani ilaasortat ilaat isumaqarput.
Qaqortumi nutaamik mittarfiliornerup inuiaqatigiit aningaasaqarnerannut qanoq kinguneqassanersoq nalunaarusiaq isumaqanngilaq tamanna Kommune Kujallermut pitsaanerpaajusoq.
IA-p Kommune Kujallermi gruppini ilaasortat ilaat tusagassiorfinnut nalunaaruteqarluni allappoq. Taama isummertut tassaapput Naja Lund, Henning Jensen, Piitaq Lund, Sofia Olesen aamma Angutitsiaq Isbosethsen.
Kujataaniit avammut toqqaannartumik aqquteqalernissaq, nunallu sinneranut pitsaasumik aqquteqalernissaq qulakkeerneqarnissaat pingaarnerpaapput, nalunaarutigineqarpoq.
Kingunissai misissorneqartariaqarput
Narsarsuarmi mittarfiup heliportinngortinnginnerani, aammalu Qaqortumi 1199 meterimik takissuseqartumik Qaqortumi mittarfiliortoqannginnerani, pissutsit arlallit misissorneqartariaqartut, taakku tikkuarpaat.
- Kujataani Narsarsuup mittarfia 1820 meteriusoq matullugu 1199 meterimik mittarfiliortoqassappat siunissami tallineqarsinnaasumik qulakkiigassagut amerlasoorujussuupput. Minnerpaamik inuiaqatigiinnut sunniutissai qulakkeerneqartariaqarput inuiaqatigiinnullu paasissutissiissutigineqartariaqarlutik aalajangiineq pitinnagu, Naja Lund, gruppi sinnerlugu allappoq.
Mittarfiit naannerit akilersinnaanerusut
Qaqortumi mittarfiliornermi takissutsit assigiinngitsut pingasut, inuiaqatigiit aningaasaqarneranut qanoq kinguneqassanersut nalunaarusiami misissoqqissaarneqarsimapput. Nalunaarusiap takutippaa Qaqortumi mittarfik 1500 meterisut takissusilik ukiut tamaasa ingerlatsinikkut amigartoorfiusassasoq, nunatta karsianit matussuserneqartariaqartunik. Mittarfiilli naannerusut amigartoorfiunatik ingerlanneqarsinnaapput.
Gruppimi ilaasortat aalajangertoqannginnerani Kujataanit angallannikkut kingunissanut tunngatillugu apeqqutinik arlalinnik akissutiserusuppoq.
Ilaatigut Danmarkimut Islandimulluunniit angalasunut aningaasartuutissat, angalanerullu sivisussusaa qulaajartikkusuppaat. Soorlu aamma Narsarsuup heliportinngortinneqarnera Kommune Kujallermut qanoq kinguneqassanersoq paaserusullugu. Kiisalu takornariat ikinnerusut Kujataanut tikittalerpata tamanna inuiaqatigiinnut qanoq kinguneqassanersoq paaserusullugu.
- Kommune Kujallermi qulakkiigassatta pingaarnersaraa avammut toqqaannaq attaveqartuaannarnissarput, tamannami ukiualuit kingumut qiviarutta annaaneqanngikkallarmat kujataamiunut angalaniarneq akikinnerullunilu oqinnerujussuunikuuvoq, taamaattumik piimasarisariaqarparput Narsarsuup avammut ukioq kaajallallugu ammarneqaqqinnissaa, Naja Lund allappoq.