Naatsumik filmilialiaq aqqutigalugu nungusaataanngitsumik qaleralinniartarnissaq kaammattuutigineqartoq
Sumulluunniit attuumassuteqaratik suleqatigiit Oceans Northikkut naatsumik filmiliartik aqqutigalugu Kalaallit Nunaanni nungusaataanngitsumik qaleralinniartoqarnissaa sammivaat, innuttaasullu akornanni tigussaasumik oqaloqatigiittoqarnissaa anguniarlugu.
Oceans Northip naatsumik filmilliamik nutaamik saqqummiussinermigiut takutikkusuppaa, Kalaallit Nunaanni nungusaataanngitsumik qaleralinniarnerup qulakkeerneqarnissaanut qanoq iliortoqarsinnaanersoq.
Naatsumik filmiliaq saqqummiunneqarpoq, Kalaallit Nunaata Aalisarneq pillugu Ataatsimiititaliarsuarmut aalisarneq pillugu eqqarsaqqinnissamik aaqqissuussinissamillu suliaqaqqusinerata malitsigisaanik.
Ocean Northimit oqaatigineqarpoq, sineriammut qanittumi qaleralinniarneq Kalaallit Nunaanni isumalluutit pingaarnersaasa ilagigaat, aamma kitaata avannaani inuiaqatigiinni aalisartorpassuit aningaasarsiornerannut pingaarnersaasoq.
- Isumalluummik tassannga pingaaruteqaqisumik nungusaataanngitsumik aqutsineq Kalaallit Nunaanni inuiaqatigiinnut piffissaq ungasinnerusoq eqqarsaatigalugu iluaqutaasussaavoq, taakku erseqqissaapput.
Aalisarneq pillugu Ataatsimiititaliarsuarmut inassuteqaatit tigussaasut
Oceans Northip Aalisarneq pillugu Ataatsimiititaliarsuarmut inassuteqaatit tigussaasut arlallit siusinnerusukkut saqqummiunnikuuvai, ilaatigut tassaasut nungusaataanngitsumik tunngaveqarnissaq, aqutsinissamut pilersaarutit, ilisimatuussutsikkut siunnersuisoqarnissaq, najukkami ilisimasanik katersinissaq, aningaasarsiornikkut pissutsinik misissueqqissaarnissamut siunnersuut, akuersissuteqartarneq pisassiissuteqartarnerlu aamma aalisarnerup immap naqqanut sunniuteqartarnera.
- Neriitigaarput naatsumik filmiliaq una aqqutigalugu nungusaataanngitsumik qaleralinniartarnissap ineriartortinneqarnissaa pillugu oqallittarneq siuarsaaffigineqarlunilu tigussaasumik oqallittoqassasoq, Ocens Northimi siunnersorti Parnuna Egede oqarpoq.
Oceans North
Oceans North naalagaaffimmut attuumassuteqanngitsumik suliniaqatigiiffiuvoq (NGO), nunap inoqqaavi sineriammilu najukkani inuiaqatigiit suleqatigalugit imaata illersorneqarnissaanik siuarsaaniarlunilu imaani uumassusilittut isumalluutit nungusaataanngitsumik atorneqarnissaannik sulissuteqartoq. Oceans North Canadami qullersaqarfeqartoq, Nuummi allaffeqarlunilu sulisoqarpoq, aamma 2011-mili Kalaallit Nunaanni suliniuteqartarsimavoq, soorlu tamanut attanneqarsinnaasumik aalisarnermik aaqqissuusseqqinnissaq, uuliakoortoqarsinnaaneranut upalungaarsimanermut pilersaarutinik misissuisarneq, kiisalu Pikialasorsuaq pillugu ataatsimiititaliarsuup Pikialasorsuup siunissaa pillugu Canadap-Kalaallit Nunaata sulissuteqarneranut tapersersuisimalluni.
Naatsumik filimiliami ilaatigut apeqqutigineqarput, piffissami sivisuumi iluatsitsisoqarnissaanut qanoq ingerlatsisoqarsinnaanersoq? Aalisartut inooriaasiat, najukkani innuttaasut ingerlalluarnissaannut aaliskkanillu ajunngitsumik isumaginninnissaannut qanoq ikiuussinnaavugut?
Oceans North piareersimavoq aalisarnermik inuussutissarsiuteqartunik oqaloqateqarnissamut aamma issittumi oqartussat Canadamilu imarpimmut qanittumi najugallit assigusumik suliaqartu misilittakkanik avitseqatiginissaannut, NGO-mi suliaqartoq oqarpoq.
Naatsumik filmiliaq takuuk, imatut taaguuteqartoq 'Aalisarnerup siunissaanik qulakkeerinninneq: Qaleraliup Kalaallit Nunaanni innuttaasunut pingaaruteqassusaa':