Naatsorsuutit: Tusagassiorfik kusanartumik angusaqartoq
Tusagassiorfik Sermitsiaq.AG 2017-imi akileraarutit ilanngaatigereerlugit 5.473 million koruuninik sinneqartoorpoq, tamannalu 2016-imi 4,276 million koruuninik angusamiit pitsanngoriaataalluinnarpoq
Angusaq siulersuisunit assut naammagisimaarneqarpoq, erseqqissaassutigaallu:
- Taamatut angusaqarneq siunissami Kalaallit Nunaanni pituttugaanngitsumik tusagassiisarnissamik qulakkeereqataassaaq.
- Angusani inuiaqatigiinni aningaasaqarnikkut pitsaanerusumik ingerlasoqarnera sulissussameernerusoqarneralu malunniussimapput, ussassaarutinik tuniniaasoqarneranik sunniuteqartumik. Tusagassiorfiup ukiup ingerlanerani aaqqissuisoqarnermut ineriartornermullu aningaasaliineq ingerlattuarsimavaa, soorlu aamma nukissat amerlineqartarsimallutik kalaallisut qallunaatullu assigiimmik saqqummersitsisarneq qulakkeerniarlugu. Tamakku saniatigut tusagassiorfimmi arlalitsisut pisariillisaasoqarsimavoq aaqqissuusseqqittoqarlunilu.
Digitalikkut siuariarneq
Digitalikkut ingerlatsinermi pitsanngorsaasoqarsimavoq.
- Ukiup ingerlanerani nittartakkap pitsanngorsarneranut aningaasaliisoqarsimavoq, nutaamik ilusilerlugu kiisalu angallattakkatigut takuneqarsinnaanngorsaasoqarluni.
Nittartagaq 30,6 millioneriarluni takuniarneqarsimavoq. Ukiup siuliani 2016-imi 22,7 millioneriarluni takuneqarsimalluni
Nittartakkami ussassaarutit ukiup siulianut naleqqiullugu amerliartorsimapput, tamanna ilisimatitsissutigineqarpoq.
Pisartagaqartut
Aviisinik naqinneqartartunik marlunnik tuniniaaneq nunani kitaaniittuni ineriartorneq assigalugu 2016-imut naleqqiullugu appariarsimavoq. Qarasaasiakkulli pisartagaqartut amerlisimapput. Qarasaasiakkut pisartagallit kiisalu aviisinik naqitanik tunisat 2016-imut naleqqiullugit amerlisimapput.
Sermitsiaq.AG-p 2017-imi ussassaarutinik tuniniaanermi kaaviiaartitsinera naammaginarsimavoq, internetimi ussassaarutit sulisussarsiornerillu pitsaalluinnartumik angusaqarfiusimallutik.
Aviisit ukiup ingerlanerani sammisanik assigiinngitsunik amerlanerusunik ilanngussaqarlutik tunisaqarluarsimapput.
Ugeaviisi sinneqartuulaartoq
Nuuk Lokalreklame A/S Nuuk Ugeavisimik saqqummersitsisartoq ukiup siulianisut angusaqarpoq, angusalli ingerlatseqatigiiffiup illuutaasa annertuumik aserfallatsaaliornermut aningaasartuutaannit annertuunit sunnerneqarput.
Nuuk Lokareklamemi akileraareerluni ukiumut 124.000 koruuninik sinneqartooruteqarpoq, ukiup siuliani 126.000 koruuninik sinneqartoorfiulluni.