Naatsorsuutit: Banknordikimi naatsorsuutit appariartut
Banknordikip Kalaallit Nunaanni iluanaarutai ukiup affaanut naatsorsuutini ukiup siulianut sanillersuunnerini 50 procentit missaanni appariaateqarput. Pisortaaneq nassuiaatissaqarpoq pakatsisimanngilluinnarlunilu.
Tamanna ukiup affaanut naatsorsuutini Banknordikip saqqummiussaani allassimavoq.
Aningaaseriviup Kalaallit Nunaanni immikkoortoqarfiata angusaasa akileraarutit ilanngaatiginnginnerini 8 millioner koruuniupput 2017-imi ukiup affaanut naatsorsuutini 14 millioner koruuniusimasut.
Ernumanngitsoq
Savalimmiormiut aningaaseriviutaat Savalimmiuni, Danmarkimi Kalaallit Nunaannilu ingerlatsiveqartup Kalaallit Nunaanni angusarlunneq ernumassutiginngilaa.
Aningaaserivimmulli ingerlatsinermut angusat katillugu 142 millioner koruuniupput, tamanna ukiup siulianut sanillersuunnerini malunnaatilimmik qaffariaateqarfiuvoq, taamaammallu aningaaserivik ukiumut angusassatut naatsorsuutini 175-225 millioner koruuniusimasut 190-240 millioner koruuninut qaffappai.
Ukiup siuliani aaqqissuussinermut millionerpaaluit atunngitsoorneqarsimaneri qaffariaateqarnissamut peqqutaaqataavoq.
- Pakatseqqanngilanga
Banknordikip Kalaallit Nunaanni aningaaserivimmi immikkoortoqarfiani pisortaanera Árni Ellefsen Sermitsiaq.AG-mut oqarpoq.
- Angusat pakatsissutiginngilakka. Ukioq kingulleq kvartalip pingajuanni atuisumik nukittuumik annaasaqarsimanerput appariaateqarnermut nassuiaatigineqarsinnaavoq. Tassa ukiut kingulliit marluk ukiup affanut naatsorsuutinik sanillersuussinermi angusarluttoqarsimasutut isikkoqarpoq. Kalaallit Nunaannilu kvartali siullermiit aappaanut pitsaasumik ineriartortoqarnera isumalluarfigaara, Árni Ellefsen oqarpoq.
2017-imi ukiup affaani siullermi taarsigassarsititsinerit 685 millioner koruuniniit ukioq manna ukiup affaani siullermi 593 millioner koruuninut appariartinneqarsimapput. Taarsigassarsititsinikkummi aningaaseriviit isertitaqarnerusarput.
Taarsigassarsisitsisarnerup akunnattumik qaffa riarnera
Aningaaseriviup ataatsimut angusai pillugit pisortaaneq oqarpoq:
- Inerneri, taarsigassarsisitsinerup akunnattumik qaffannerannit, erniat assigiinngissutaannit kiisalu ataavartumik qaffasissusilimmik sullissanik kiffartuussinermit sunnerneqarput. Ukiup affaata siulliup ingerlanerani aamma suliniutit arlallit, sullissat misigisaannik pitsanngueqataasussat aallartissimavagut.
Kalaallit Nunaanni aningaasat uninngasuutit 844 millioner koruuniniit 613 millioner koruuninut appariartinneqarsimapput. Tamanna tupannarsinnaavoq aningaaserivinnili aningaasanik uninngasuuteqarneq aningaaserivinnut aningaasartuutaasarmat maannakkut aningaaseriviit aningaasanik uninngasuuteqarnissartik orniginngilaat.