Naatsorsuutit: Air Greenland rekortiliivoq

Air Greenland 2018-imisut amerlatigisunik timmisartumut ilaasoqarsimanngisaannarpoq, naatsorsuutit saqqummiunneqaqqammersut tamanna takutippaat.

Kaaviiaartitat qaffariarneranni, 1.370,1 millionit koruuniusuni, akileraannginnermi Air Greenland suliffissuartut 80,8 millionit koruuninik angusaqarpoq.

- 2018-imi Air Greenland 80,8 millionit koruuninik angusarissaarpoq, tassani angallavinni attartortitsisarnernilu niuerfitsinni naatsorsuutigisamit annertunerusumik suliaqarsimalluta. 2018-imi timmisartunut ilaasut 431.000-iupput, aatsaat taama amerlatigalutik – sulisugut tamaasa qutsavigerujussuarpagut, taakkoqanngitsuuppatami taamatut angusaqarnissarput pisinnaanngikkaluarmat, siulersuisuni siulittaasoq Kjeld Zacho Jørgensen tusagassiuutinut nalunaarummi oqaluttuarpoq.

Angallavinni siuariarneq

2018-imi angallavinni angallannerit 4 procentinik amerleriarput. Amerleriiaatit 87 procentii Kangerlussuup Københavnillu akornanni aallarfinneersuupput.

- 2017-imi Islandimut timmisartuussinigut annertusivagut, tamatumalu kingunerisaanik 2018-imi Kalaallit Nunaata Islandillu akornanni ilaasut 29 procentinik amerlanerusut timmisartuunneqarput. Tamanna Islandimi niuerfiup 12 procentinik appariarneranut, taamaalillunilu Air Greenlandimi niuerfimmi pissarsiassat amerleriarnerinut naleqqiullugu isigineqassaaq. Pingaartumik aasaanerani Ilulissat, Kangerlussuup aamma Reykjavikip akornanni angallavimmi ilaasut sisamariaatingajammik amerlinerisigut Air Greenlandip pissarsiai amerlanerulerput, siulersuisuini siulittaasoq oqarpoq.

Jacob Nitter Sørensenip aqutsisoqarfimmi pisortaanertut atorfeqarneramini naatsorsuutit tamakkiissut siullermeerluni saqqummiussarai.

Sila aamma teknik unamminartut

Ukiumi silap ingerlatseqatigiiffimmut unamminertoqarnerani angusarissaarneq nuannaarutigalugu Sermitsiaq.AG-mut oqaatigaa. 2018-illu aallartinnerani timmisartuutileqatigiiffik Airbusiutaa teknikkikkut ajornartorsiuteqarpoq, tamatuma sullitat aamma timmisartuussinissaat sunnerpai.

2019-imi timmisartuutileqatigiiffi up ilaasut aatsaat taama amerlatiginerat attatiinnarniarlugu aamma timmisartuussisarnermi siuariartornissaq pimoorunniarpaa.

- Ukiut pissanganartut ornitavut qilanaaraagut. Aappaatigut manna attaveqaatini atorneqartuni sullitanik kiffartuussinerput angallavinnullu pilersaarutivut pitsanngorsartussaavagut, illuatungaatigullu attaveqaatit nutaat misissortussaavagut, Air Greenlandilu 2023-mi qanoq isikkoqassanersoq naliliiffigisussaallugu. Taamaattumik Air Greenlandip unammillersinnaassusia, sullitanik kiffartuussinera, piujuartitsiniarluni suliniutai aammalu aaqqissuussaanera suliffissuartullu ineriartornera pillugit suliniuteqarnissamut pingaarutilinnik aalajangiisoqartussaavoq, Jacob Nitter Sørensen ilisimatitsivoq.

Powered by Labrador CMS