Naatsorsuutiginninneq: Ilulissani inuit amerlanersaat tunillatsissapput
Avannaata Kommuniani nakorsap Peter Vedstedip naatsorsuutigaa, Ilulissani innuttaasut amerlanersaat coronamik tunillatsikkumaartut. Tuniluuttoqarnerali sapaatip-akunnerisa marlussuit qaangiunneranni annikilliartulerumaarnerarlugu.
Ilulissani maannakkut ikinnerpaamik 600-t tunillatsissimasuupput, peqqinnissaqarfimmiillu ilimagineqarpoq, illoqarfimmi inuit 1.000-it sinnerlugit tunillatsissimasoqartoq.
Avannaata peqqinnisaqarfia Facebookikkut taamatut nalunaaruteqarpoq.
Najukkami nakorsap Peter Vedstedip Sermitsiaq.AG-mut nassuiaatigaa, Ilulissani inuit amerlanersaat spaatip-akunnerisa marlussuit ingerlaneranni coronavirusimik tunillatsikkumaartut ilisimagineqartoq.
- Maannakkorpiaq annertuumik tuniluuttoqarpoq. Ulluni makkunani tunillatsittarfut 40 procentit sinnertarpaat. Taamaammat kikkut tamarmik annikinnerusumik annertunerusumilluunniit tunillatsissimasuunissaat naatsorsuutigineqartariaqarpoq. Innuttaasullu taamaammat tunillatsissimagunik arlaannut pulaassagunik angalassagunilluunniit immikkut ittumik mianersortariaqarput, Peter Vedsted Sermitsiaq.AG-mut oqarpoq.
Napparsimaruluttoqanngitsoq
Najukkami nakorsap oqaluttuaraa, tunillatsissimasut amerlanersaasa ersiutitik annikittunnguamik nuannertut misigisaraat. Ilulissani maannakkorpiaq coronaqartunik uninngasoqanngilaq, tunillatsissimasullu angerlarsimaffimminni mattusimanermikkut qaangiisinnaasut.
- Illoqarfimmi tunillatsissimasorpassuaqarpoq. Taakku arlaannaalluunniit napparsimarulussimanngillat. Tamanna pitsaasutut isigaarput, naatsorsuutigalugulu tuniluuttoqarnera sapaatip-akunnerisa marlussuit qaangiunnerani annikilliartulissasoq. Tamanna Upernavimmi takoreersimavarput, Peter Vedsted oqarpoq.
Illoqarfimmi qitiusut suliaqarfiit tamarmik, tassa politiit, peqqinnissaqarfik aningaasarsititsisarnerlu kiisalu pisiniarfiit meeqqeriviillu ajunngitsumik suli ingerlapput. Inuiaqatigiillu ingerlaannassappata, najukkami nakorsaå innuttaasut mianersortuarnissaannik kaammattorpai.
- Ersiutillit tamarmik angerlarsimaannartariaqarput. Pinngitsoorani misissortittoqartariaqanngilaq. Ersiuteqaruilli coronaqalersimanissat ilimanarpoq. Kikkut tamarmik taamaallutik tunillatsissimanissaa ilimanarpoq, ataatsikkorsuarli tunillatsittoqarsinnaanera pinngitsoortinniartariaqarparput, Peter Vedsted oqarpoq.
Ilulissani innuttaasut aqqaneq-marlunnik ukioqalereersimasut 84 procentii aappassaanik akiuussutissalerneqareerput, innuttaasullu pingasorarterutaat pingajussaanik akiuussutissalerneqarsimallutik.