Naatsiiat iginneqartarnerat arlallit akissutiserusuppaat
Naatsiiat nunatsinni tunisassiarineqartut amerlaqisut iginneqartarput, taamaattumillu ilaatigut toqqortarinerat pitsaanerusariaqartoq naalakkersuinermik suliallit SPS-imilu siulittaasoq isumaqarput.
Kalaallit naatsiianik tunisassiornerat piorsarneqartuartariaqarpoq.
Taama Kommune Kujallermi borgmesteri Stine Egede (IA) isumaqarpoq. Kalaallit naatsiianik tunisassiaat amerlavallaat ukiuni kingullerni igiinnarneqartarput, tamannalu allanngortinneqartariaqartoq kommunip nittartagaani allappoq.
Aviisi Sermitsiaq taama allappoq.
Savaatillit Peqatigiit Suleqatigiissut siulittaasuat Elna Jensen aamma ernumavoq, naak Kujataani naatsiiarpassuit igiinnarneqartarnerat nutaajunngikkaluartoq. Pissutsit arlaqartut peqqutaaqataapput, Elna Jensen oqaluttuarpoq.
- Igiinnarneqartarnerannik ajornartorsiut soorunami tusartuartarparput, nalunngilaralu tamanna arlalinnik peqquteqartoq. Ukiut ingerlanerini naatsiiat tonserpassuit igiinnarneqartarput, niuertarfippassuit Neqi A/S-imit pisiarineq ajormatigit, assartuussinermi akit qaffasippallaarnerannik peqquteqarsinnaasumik, Elna Jensen Sermitsiamut oqarpoq.
Naatsiianik naatitsineq katersinerlu piffissaajannarlunilu pisariuvoq, arlalitsigulli naatsiiat niuertarfinnut annguttut ajortunngoreersimasarput. Taamaattumik tamanna aaqqiivigineqartariaqarpoq pitsaanerusumik toqqortarinerisigut, Elna Jensen isumaqarpoq.
Allaaserisaq tamaat Sermitsiami saqqummersumi kingullermi atuaruk, uani:
