Naatsiiat 20 tonsinit amerlanerusut ukioq kingulleq iginneqartut
2019-imi naatsiiat pisiarineqartut misissoqqissaarneqarmata naatsiiat 10 tonsit qerisoortinneqarlutik tunisinnaanngimmata akuerineqarsimanngillat, taamaattumik Neqi A/S-imit igiinnarneqartariaqarsimallutik
Naatsiiat 20 tonsit sinnilaarlugit Neqi A/S-ip igiinnarpai ukioq kingulleq.
Tamanna Neqi A/S-ip fabrikimi pisortaata Ole Vestergaardip Sermitsiaq.AG-mut ilisimatitsissutigaa.
- 2019-imi naatsiiat pisiarineqartut misissoqqissaarneqarmata naatsiiat 10 tonsit qerisoortinneqarlutik tunisinnaanngimmata akuerineqarsimanngillat. Neqi A/S-illi naatsiiat taakku akilersimavai, sulisussaaleqineq peqqutigalugu naatsiiat immikkoortiterneri kinguaattoorsimammata, aammalu naatsiaanik naatitsisartoq pigiinnarusukkatsigu, KNI tusagassiutinut nalunaarummi allappoq.
Tuninnginnerini ajortittut
Naatsiiat ti tonsit aalajangersimasumit pisiarineqartut saniatigut tonsit marlussuit igiinnarneqartariaqarsimasut Ole Vestergaardip oqaatigaa.
- Aamma tonsit arfineq marluk - arfineq pingasut missaanniittut igiinarneqarput tunineqannginnerini ajortinnerat pissutaalluni, Neqi A/S-ip fabrikiani pisortaq oqarpoq.
Naatsiiat tuniniarneqarneri aamma kingusinnikuuvoq, savanik toqoraanerup nalaani naammattunik sulisoqarniarneq ajornarsimammat, ilisimatitsivoq.
Naatsiiat panertut
Pisiniarfiit naatsiianik qanoq amerlatigisunik pisassanersut qaqugukkullu tamanna pisassanersoq maanna inissinneqartoq KNI ilisimatitsivoq, taamaalillutik pisiniarfiit piffissami septembarimiit decembarip tungaanut Danmarkimut naatsiiarsiniarnissartik annikillisinnaanngorlugu.
Taassuma saniatigut naatsiianik ajoquteqannginnerusunik peqartalernissaq, assersuutigalugu naatsiiat panertunut atugassanik, Neqi A/S-imiit sulissutigineqarpoq, kiisalu neriniartarfiit naatsiianik pitsaasunik nunatsinneersunik aasaanerani pisisinnaanissaat anguniarlugu aamma sulissuteqartoqarluni.