Naatsiianik naatitsisartoq: Neqi A/S-ip namminersortut unammillerpai

Narsap avannaani kangerlummi Sermilimmi Eqaluit Iluanni najugalik Ferdinand Egede naatsiianik naatitsisartuuvoq, tamannalu ukiuni 20-ni sammillugu ineriartortissimallugu. Ilaquttani peqatigalugit ukiorpassuarni savaatiliusimavoq, 2014-imili aalajangersimavoq naatsiianik naatitsineq kisiat sammilerniarlugu, savaateqarnerlu erniminut tunniullugu.

Sermitsiaq aviisi allappoq.

Namminersortut unammilerai

– Neqi A/S-imi qullersat juunimi piumasaqarfigeriataarpaatigut unammillissagivut, paasivarpullu siorna Tuttuuni naatsiiassanik ikkussuisimasut, uagut namminersortut unammillerniarluta. Tamanna paasigatsigu tupaqaagut, tassami selskabi pisortanit pigineqartoq uagutsinnut namminersortunut qanoq isilluni unammillerniarsinnaava? Neriussimagaluarpugut oqartussat akuliutissasut tamannalu aaqqiivigalugu, tassami naatsiianik katersinitsinni kinguaattooreersimagatta. Ulluni kingullerni Neqi A/S-ip pisortaa oqaloqatigigaangatsigu akiuaannartarpoq uagutsinnit pisissanerluni nalullugu, naatsiiat namminneq naatissimasatik pisiareqqaarniaramikkit, uaagutsinnillu pisissagaluarunik kingullerpaajutinneqassasugut. Tupannerput suli alleriaraangami, ilami naatsiiassarpassuarnik ikkussuisimagatta, Ferdinand Egede oqarpoq.

Ukiut marluk matuma siorna aallartittoq

Naatsiianik naatitsisartut ukiut marluk matuma siornatigulli paasitinneqarsimapput Neqi A/S Kangerluarsorujuup Qinnguani nammineq naatsiianik naatitsisalersoq, siornalumi aamma taamaasiorsimalluni.

– Siorna Neqi A/S-imit paasitinneqarpugut Nunalerinermut Naalakkersuisup Suka K. Frederiksenip uiata Sofus Frederiksenip tamanna isumagisimagaa, Neqi A/S-illu suut tamaasa akilersimagai, naatitassanik ikkussuineq aammalu naatsiiat katersorneqarnerat Neqi A/S-ip nammineq akilersimagaa, isumaqarpungalu tamanna ukioq manna aamma pisimasoq, Ferdinand Egede oqarpoq.

Allaaserisaq Sermitsiaq aviisimi tamakkerlugu atuaruk, aviisi digitaliusoq uani pisiariuk:

Sermitsiaq Uge 34 2017

Klik her for at læse