Skip to main content

Naatitat qeqqussanik taarserneqarsinnaapput

Kalaallit Nunaanni qeqqussat naatitat tikisinneqartartut tallimararterutaannut taartaasinnaasut, DTU-mi misissuisimanerup nutaap takutippaa.

Naatitat, soorlu spinatit kangiamiullu qeqqussanit salatiliaat nunatsinnut eqqunneqartartut qeqqussanik nunatsinneersunik taarserneqarsinnaapput.

Qeqqussat ilaat qeqqussanut allanut sanilliullugit nerisassaqqinnerusarput, qeqqussallu erngup errortuutikup kuutsiffigisimasaata eqqaaniittut katersorneqartassanngitsut ilisimatusarnermi inerniliunneqarsimavoq.

DTU Fødevareinstituttimi ph.d-nngorniartoq - Katharina Johanna Kreissig, Kalaallit Nunaanni qeqqussanik assigiinngitsunik qulinik misissuisimavoq, tassani naatitat tikisinneqartartut qeqqussanik taarserneqarsinnaanersut paasiniarsimallugu.

Katharina Johanna Kreissigip misissuisimanini tunngavigalugu nalilersimavaa, naatitat Kalaallit Nunaannut tikisinneqartartut 5-20 procentii Kalaallit Nunaanni qeqqussanik taarserneqarsinnaasut.

Inuussutissaqarluartut

Qeqqussat misissorneqarsimasut Sisimiuni DTU Campusip eqqaaniinnerusuoq katersorneqarsimapput, DTU-llu naliliinera naapertorlugu paasisat isumalluarnartuupput:

- Misissuisimanerata takutippaa, Kalaallit Nunaanni qeqqussat inuussutissaqarluartuusut soorlu calciumimik, saviminissamik omega-3-millu imaqarluartut, DTU Fødevareinstitu tusagassiorfinnut nalunaaruteqarluni allappoq.

Institutti naapertorlugu, qeqqussat pilutakkaajusut jodinik ulikkaarput, jodinillu annertuallaamik iisaqarsimanermi ajornartorsiutaasartut pinngitsoortinniarlugi qeqqussat suliarineqaqqaartarnissaat pisariaqassasoq oqaatigineqarpoq.

Misissuinerit aamma takutippaat, qeqqussat aatsitassanik oqimaatsunik, soorlu arsenimik, aqerlumik kviksølvimullu imaqartut, qeqqussalli 'annikitsuinnarnik' oqimaatsunik aatsitassartaqartut, DTU-mit oqaatigineqarpoq.

Erngup errortuutikup kuutsiffigisimasaata eqqaani katersisoqassanngitsoq

Instituttip mianersoqqutigaa, qeqqussanik erngup errortuutikup kuutsiffisimasaata eqqaani katersisoqarsinnaaera. Qeqqussammi erngup errortuutikup eqqaaniitut 'tappiorannartunik napparsimalersitsisinnaasunik annertuallaartunik akoqartarmata'.

- Qeqqussat taakkunaneersut inuussutissatut atorneqarsinnaanngillatm DTU Fødevareinsitutti allappoq.

Katharina Johanna Kreissigip aamma upperaa, qeqqussat Kalaallit Nunaata avammut nioqqutigilluarsinnaagai, neriuutiginerarpaalu misissuisimanini tamatumunnga iluaqutaasinnaasoq:

- Qeqqussat akui pillugit misissuisimanermi ilisimalikkat, kalaallit immap iluani isumalluutitik inuussutissaqarluartut iluaqutiginissaannut tunngavissiisinnaapput, taanna oqarpoq.

Namminersorlutik Oqartussat aalisarnemik ingerlatseqatigiiffiutaat Royal Greenland 2020-mi aasakkut Maniitsup eqqaani misileraalluni qeqqussanik katerseqqaarsimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER