Naasuliardarpi saamit oqaasiinut nutserneqalersoq

Saamit atuakkanik saqqummersitsivia, Davvi Girji, aalajangerpoq Niviaq Korneliussenip atuakkiaa Naasuliardarpi saamit oqaasiinut nutserneqassasoq. Saamit atuakkiortuisa Niviaq Korneliussenip Nunat Avannarliit Siunnersuisoqatigiivisa Atuakkiortunut nersornaasiuttagaanik tunineqarsimanera pillugu pilluaqquaat.

Niviaq Korneliussenip atuakkiaa Naasuliardarpi 2020-meersoq saamit oqaasiinut nutserneqalerpoq. Saamit atuakkanik saqqummersitsiviata atuakkamik saamit oqaasiinut nutsikkamik saqqummersitsinissaq isumagissavaa.

Saamit Atuakkiortut peqatigiiffiat, SGS, tusagassiorfinnut taama nalunaaruteqarput.

Saamit atuakkiortut peqatigiiffiata ilanngullugu Niviaq Korneliussenip Nunat Avannarliit Siunnersuisoqatigiivisa Atuakkialerisunut nersornaasiuttagaannik tigusisuusimanera pillugu pilluaqqujumavaat.

- Kalaallit Nunaanneersumik aatsaat taama nersorinnittoqarpoq. Kalaallit Atuakkiortunut tamanna ataqqinaataavoq angisooq, soorlu aamma nunarsuup sinnerani nunat inoqqaavini atuakkiortunut aamma ataqqinaataasoq, saamit peqatigiiffiat allappoq.

SGS-ip atuakkiaq, inuunerup ajornarluinnarsinnaaneranik, inuullu ineriartorneranik imaqartoq, pingaaruteqarluinnartutut taavaa.

Niviaq tulluusimaarutigaa

- Atuakkaq takutippaa Kalaallit Nunaat, nunat inoqqaavisa atuakkiortui allat assigalugit, atuakkiortunik piginnaasagilluinnartunik peqartoq. Atuakkiortoq Niviaq Korneliussen nunap inoqqaavisa kinaassutsiminnik nassaarniarnerannut tunngasumik pingaaruteqarluinnartumik atuakkiorsimavoq. Atuakkap aamma sammisai, soorlu imigassamik ajornartorsiuteqarneq imminullu toquttarneq, nunat inoqqaavisa allat aamma ilisarilluarsinnaavaat.

2021-mi ukiut 30-t qaangiupput saamit atuakkiortuat Nils Aslak Valkeapää, atuakkiani Beaivi, Áhčážan (Seqineq, ataataga) pillugu Nunat Avannarliit Siunnersuisoqatigiivisa Atuakkiortunut nersornaasiuttagaannik tigusisussatut toqqarneqarmat.

- Saamit sinnerlugit SGS-ip Kalaallit Nunaanni atuakkiortut peqatigalugit oqaatigerusuppaa: Niviaq Korneliussenip nersorneqarnera tulluusimaarutigeqaarput, SGS allappoq.

Powered by Labrador CMS