Naartulerusullutik peqqinnissaqarfimmi ikiorneqarusuttut peqqinnissakkut sillimmaserlutik akiliutsissinnaanngillat
Meerartaarsinnaanngitsut Kalaallit Nunaanni nakorsarneqarnerat naammanngippat, taamatullu Danmarkimi nakorsarneqassagunik namminneerlutik aningaasartuuteqartartussanngorput. Peqqinnissakkummi sillimmasiinerup nakorsartinnernut taama ittunut aningaasartuuteqarneq ajorput.
Peqqinnissaq pillugu sillimmasiinermi naartulerniarluni nakorsartinneq aningaasatigut nalinginnaasumik matussuserneqarneq ajorpoq.
Peqqinnissaqarfiup meerartaarsinnaanngitsut Danmarkimut nakorsartinneqartarnissaannut aningaasaliisarunnaarnissaat Naalakkersuisut aalajangermassuk, oqartoqaraluarpoq inuinnaat peqqinnissaq pillugu sillimmasersimasut sillimmasernertik aqqutigalugu nakorsartikkiartornissamut aningaasanik matussusiisinnaasut.
- Aalajangiineq inuit ataasiakkaat nammineq peqqinnissakkut sullimmassiineq atorlugu imaluunniit nammineq akiliilluni Kalaallit Nunaata avataani annertusisamik ikiorseqarsinnaanerup sunniuteqanngilaq, Peqqissutsimut Naalakkersuisoq, Martha Abelsen (S) tusagassiutinut nalunaarummi maajip arfineq-aappaanni nassiunneqartumi taama allappoq.
Tamannali eqqorpallaanngilaq. Sillimmasiisarfiit assigiinngitsut piumasaqaataat atuuffiilu misissoraanni, peqqinnissaq pillugu sillimmasertinnermi, naartulerniarluni nakorsartinnermut aningaasartuutit matussuserneqarsinnaanngillat.
- Sillimmasiisarfiup aningaasartuutit uku matussusersinnaanngilai: Meerartaarsinnaanngitsut meerartaarniarlutik nakorsarneqarnerat, sillimmasiisarfiit Sermitsiaq.AG-p misissuiffigisaasa piumasaqaataanni ilaatigut allassimavoq.
Aalajangerneq
Peqqinnissaqarfiup meerartaarsinnaanngitsut nunatsinni ikiorneqarsinnaanngikkaangata, Rigshospitalimut innersuunneqartarnerat siorna decembarimili unitsikkallarpaat. Unitsitsigallarnermut pissutaavoq politikkikkut aalajangertoqartariaqarmat meerartaarsinnaanngitsut akiliunneqartarnissaat pillugu, inatsimmi malillugu angalaneq, najugaqarneq nakorsarneqarnerlu peqqinnissaqarfiup akilertussaavai.
Naalakkersuisut aalajangerput maannakkuugallartoq peqqinnissaqarfiup aningaasartuutit akilertassanngikkai. Peqqissutsimut Naalakkersuisoq, Martha Abelsen (S) tusagassiutinut nalunaaruteqarluni taama ilisimatitsivoq.
Unitsitsigallarneq isumaqarpoq meerartaarsinnaanngitsut Rigshospitalimut nakorsartikkiartorusukkunik, taava angalanermut, najugaqarnermut nakorsarneqarnermullu kisimik akiliisassasut.
Aappariit ukiumut 20-t
Peqqinnissaqarfiup naatsorsuutai malillugit aappariit 20-t missaanniittut meerartaarsinnaannginnertik pillugu Danmarkimut siorna nakorsartikkiartorput. Aappariit taakku 20-t missaanniittut angalanerminnut najugaqarnerminnullu namminneerlutik aningaasartuuteqarput.
- Aningaasartuutissanut missingersuummi inuit 40-t Danmarkimi IVF atorlugu nakorsarneqassappata, taava angalaneq, najugaqarneq, nakorsaatit nakorsarneqarnerlu ilanngullugit, tamanna 5-6 milliuunit koruunit missaannik akeqassaaq, peqqinnissaqarfiup Peqqissutsimut naalakkersuisoqarfimmut ilisimatitsissutaani ilanngunneqarsimavoq.