”Naammaleqaaq”slotspladsimi takutinneqartoq
Akerliussutsimik takutitsisut 40-ngajalluinnaat, Nuummi akerliussutsimik takutitsisorpassuit assigalugit ”Naammaleqaaq” Christian Slotspladsimi ippassaq unnukkut nilliaatigaat
Inuit 1000-ingajaat Nuup qeqqani akerliussutsimik takutitseqqittut, inuit 30-niit 40-nut amerlassuseqartut piffissami kingullermi politikkikkut aalajangikkat akerleralugit Christiansborg Slotspladsimi akerliussutsimik takutitsipput.
Folketingimi ilaasortaq Aaja Chemnitz Larsen IA-meersoq, akerliussutsimik takutitsisunut Aalborgimiit oqalugiariartorsimavoq. Akerliussutsimik takutitsisut akissaatikinnerusut atugarisaasa pitsangorsaaffigineqarnissaat pinnagu ingerlatseqatigiiffiit akileraarutaannik appaasimaneq nioqqutissallu ilaasa akitsuutaannik qaffaasimaneq pillugit ernumassuteqarnerat tapersersorluinnarpaa.
Michael Bro slotspladsimi akerliussutsimik takutitsisoqarnissaanik aaqqissuussisimavoq.
- Kalaallit Danmarkimiittut, minnerunngitsumillu nunani allaniittut tusaaneqarusupput. Arlalippassuuvugut Kalaallit Nunaanni najugaqarusukkaluartut, nunatsinnili pissutsit ajorluinnartut pissutigalugit nunatsinni najugaqarsinnaanata! Kalaallit Nunaat inuuffigiuminarnerusoq ilusilersueqataaffigerusupparput, aaqqissuisoq oqarpoq.