Naammagittaalliuut: Gipsi oqimaappaalersimavoq taleralu napeqqilluni
Kukkusumik katsorsarneqarsimaneq sivisoorujussuarmillu misissuisoqartarnera napparsimasut peqqinnissaqarfimmut naammagittaalliuutiginerusarsimavaat. Peqqinnissaqarfimmut atatillugu naammagittaalliuutigineqarsimasut pillugit nalunaarusiami inuit sunik naammagittaalliuuteqarsimanersut qassillu naammagittaalliuutigisaminnut taperserneqarsimanersut atuarneqarsinnaapput.
- Unnuup ingerlanerani qeqora oqimaappallaalerluni napeqqimmat talera ilummut peqippoq. … sianiutit ajoqusernerisa (refleksdystrofi) kingunerisaanik anniartualerpunga taamaalillutik paffiga equtillugu suliarisimavaat, tamatuma peqatigisaanik talera illuasut kaajallassinnaanngilaq.
Kukkusumik katsorsarneqarsimaneq pillugu 2020-mi naammagittaalliuutigineqarsimasut ilaat taamatut nipeqarpoq, naammagittaalliuut pineqartoq nunatsinni nakorsaaneqarfimmit suliarineqarsimavoq.
Suliami pineqartumi nakorsaq peqqinnissatigullu assistenti isornartorsiorneqarsimapput, tassani saanertigut naggussatigullu nappaatilinnut immikkoortortaqarfik qinnguartaalluni assilisat pillugit oqaloqatigineqarsimasariaqaraluartoq tunngavilersuutigineqarluni.
Naammagittaalliuutit katillugit 39-t nakorsap peqqinnissaqarfimmiluunniit sulisup allap isornartortsiorneqarnerannik kinguneqarsimapput.
Nunatsinni Nakorsaaneqarfiup nalunaarusiaa ”Peqqinnissakkut sullinneqarneq pillugu maalaarutit 2017-2021”, nunatsinni nakorsaaneqarfiup nittartagaatigut saqqummiunneqartoq malillugu naammagittaalliuutigineqarsimasut arlallit kukkusumik katsorsarneqarsimanermut tunngassuteqarput.
Kukkusumik katsorsarneqarneq sivisoorujussuarmillu misissuisarneq
- Ataatsimut isigalugit maalaarutit napparsimasup nammineq kukkunertut misigisaanut imal. misissuinermut nakorsaanermullu atatillugu peqqissaannginnermut– imalunniit tamatuma amigaataaneranut immikkoortiterneqarsinnaapput, nalunaarusiami allassimavoq.
Kukkusumik katsorsarneqarsimaneq pillugu naammagittaalliuutigineqarnerpaasimasumut tulliullugu kræfti pillugu misissuisasrnerup sivisuallaartarnera naammagittaalliuutigineqarnerusarsimavoq. Nalunaarusiami taamatut inerniliisoqarpoq.
Napparsimasoq ataaseq ilisimatinneqarsimavoq, malunniutit siulliit takkunnerannit ukiut arfineq-marluk qaangiuttut kræfteqarluni.
- 2010-mi erluga pillugu siullermik nakorsiarpunga, 2017-ip tungaanut ajoquteqannginnerarpaat (ukiukkut). Paasisinnaanngisara tassaavoq suna pillugu timip sinneranut siaruaatereersoq aatsaat nakorsaanialernerat, naammagittaalliuut 2018-imeersoq taamatut nipeqarpoq.
Tassani nakorsaq isornartorsiorneqarpoq, pineqartoq erlummiit aanaartoqartarnera aarlerinartoqarneranut ersiutaasinnaammat.
Koloskopiteam skal bekæmpe venteliste
Piffissami sivisuumi misissuisoqartarnera Naalakkersuisunit qangali eqqumaffigineqarsimavoq. Naalakkersuisut 2020-mi suliniut nutaaq saqqummiuppaat, ilaatigut inalukkatigut kræfteqartoqarnersoq kræfteqartoqannginnersorluunniit paasiniarlugu koloskopi atorlugut misissortinnissamut utaqqisut ikilisarniarlugit.
Nunatsinni Nakorsaaneqarfimmit 2017-ip 2021-llu akornanni naammagittaalliuutit katillugit 541-t tiguneqarsimapput. Taakkunannga 167-it aalajangiiffigineqarsimapput, 39-llu nakorsap peqqinnissaqarfimmiluunniit sulisup allap isornartortsiorneqarnerannik kinguneqarput.
- Arlalinnik patsiseqartumik maalaarutit amerlanersaat suliarineqartanngillat aalajangiivigineqartaratilluunniit. Patsisaasut pingaarnerit tassaapput Peqqinnissaqarfimmi kiffartuussinermut tunngasuunerat, pisoqalisimanerat imal. paasissutissanik amigaateqarneq imal. paasissutissat assigiinnginnerat pissutaalluni itigartitsissutaanerat /unitsinneqarnerat.
- Maalaarutini naammassisani aalajangiivigineqartuni, peqqinnissakkut sullissisut ataasiakkaat eqqortumik iliorsimasutut naliliivigineqarmata nakorsartinnerlu tamakkiisoq maalaarutigineqarmat, isornartorsiuisoqarajunngilaq, nalunaarusiami allassimavoq.
Nunami maani kukkusumik katsorsarneqarsimaneq peqqinnissaqarfimmiluunniit sulisumit aalajangersimasumit naliliiffigineqarsimaneq taamaallaat naammagittaalliuutigineqarsinnaapput. Tamatuma saniatigut piffissami sivisuumi katsorsartissimaneq pillugu napparsimasoq naammagittaalliorpat taperserneqarsinnaanngilaq.
Tassa naammagittaalliornermi taperserneqanngikkaluarluni naammagittaalliuutigisaq pisimasinnaalluarpoq.
- Malaarutit 77%-ii isornartorsiuiffiunngitsut, napparsimasutut aqqusaartukkat peqqinnissakkut ilinniagalittut isigalugittaaq pitsaanerpaajujuaannanngillat, nalunaarusiami allassimavoq.