Naammagisimaarnartoq: Inissiaatileqatigiiffik Illuut A/S millioninik sinneqartooruteqartoq
Angusaq naammagisimaarnartoq, pisortat taama oqarput, taakku 2023-mi Illuut A/S inissianik 90-inik pisinissamik pilersaaruteqarnerani suli pitsaanerunissaa naatsorsuutigaat.
Namminersorlutik inissiaatileqatigiiffiat Illuut A/S, inissianik sanaartornermik, pigisaqarnermik, tuniniaanermik, attartortitsinermik ingerlatsinermillu siunertaqartoq, 2022-mi sinneqartooruteqarpoq.
Tassani akileraareernermi 25,4 millionit koruunit pineqarput.
Taamaakkaluartoq 2021-mut sanilliullutik akileraannginnermi 34 millionit koruuniunerannit 3,2 millionit koruuninik ikileriartut, naatsorsuutit ileqquusumik ataatsimeersuarneqarneranut atatillugu kisitsisit takutippaat.
Kisianni 20 millionit koruuniunissaannik naatsorsuutigineqartunit sinneqartoorutit amerlanerupput.
Tassani ingerlatsinermi aamma allaffissornermi missingersuutinut sanilliullugu sipaarniartoqarsimaneranik tamanna pissuteqartoq, ingerlatseqatigiiffik ukiumoortumik nalunaarusiami ilisimatitsivoq.
11 millionit koruunit aserfallatsaaliuinermut immikkoortinneqarnissaat ataatsimeersuarnermi akuerineqarpoq, taamaalilluni tassunga kontomut aningaasat katillugit 92 millionit koruuniupput.
Angusaq naammagisimaarnartoq
Illuut A/S inissianik tunisinerminit naatsorsuutigisamit annerusumik sinneqartooruteqarluni angusaqarneranik ukiumi angusat ilaatigut pissuteqarput. PPV-mut 7,5 millionit koruuninik atuisoqarpoq (aserfallatsaaliuinermut pilersaarummut), tassani 11 millionit koruunit missingersuutigineqarsimagaluarput.
Angusaq Illuut A/S-mi aqutsisut naammagisimaarneqarpoq.
Tabelimi ataani ingerlatseqatigiiffiup ukiuni tallimani kingullerni angusai pingaarnerit takutinneqarput:
Inissianik 90-inik pisineq
Illuut A/S-p 2023-mi isumaqatigiissutit assigiiaarneqarnerisigut aamma pisiortorfinnut isumaqatigiissuteqarnerit suliassat pitsanngorsarneqarnissaat naatsorsuutigaa.
Ingerlatseqatigiiffik taarsiullugu suliniutinut nutaanut annerusumik aallussaqarniarpoq, tassani suliniut Tulliit maanna ingerlanneqalereersoq ilanngullugu.
Illuut A/S 2023-mi inissianik 90-inik allanik pisinissamut isumaqatigiissutigineqassasoq aamma naatsorsuutigineqarpoq, taakku 2024-p aamma 2025-p ingerlanerani iserterfigineqarnissaminnut piariissapput.
Kaaviiaartitat 2023-mi 72,5 millionit koruuniunissaat aamma akileraannginnermi angusat 29,8 millionit koruuniunissaat naatsorsuutigineqarpoq.