pisinnaatitaaffiit
Naamik... meeqqat sunut tamanut pisinnaatitaaffeqanngillat
Meeqqat kissaataasa pisinnaatitaaffiisalu assigiinngissuteqarnerat pillugu Nakuusa nutaamik paasisitsiniaalerpoq
Nakuusap paasisitsiniaanera nutaaq ´Kinami oqass´? Uagut oqass´! sapaatip akunnerani uani aallartissaaq.
Nakuusap suliniummigut inersimasut kajumissaarniarpai meeqqat inuusuttullu inuunerannut asannittumik akuleruttaqqullugit, aammattaarli meeqqanut inuusuttunullu sianigeqqullugu meeqqat kissaataat pisinnaatitaaffiilu assigiinngissuteqarmata.
Paatsuuinerit
Suliniutit ingerlatseqatigiiffiillu amerlasuut ukiuni kingullerni ataatsimoorlutik kivitsisarsimapput, Meeqqanullu isumaqatigiissut naapertorlugu meeqqat pisinnaatitaaffii pillugit innuttaasunik paasissutissiillutik. Tamanna pissutigalugu meeqqat pisinnaatitaaffiinik ilisimasaqarneq annertuumik siuariarsimavoq. Tamannali peqatigalugu Nakuusap paasisimavaa samminninnerujussuaq tamanna aamma paatsuuinernik kinguneqartarsimasoq.
– Meeqqat, angajoqqaat ilinniartitsisullu naapikkaangatsigit misigisarparput nalornissutigineqartoq meeqqat pisinnaatitaaffii qanoq isumaqarnersut. Meeqqat pisinnaatitaaffii assersuutigalugu isumaqarpat meeqqat namminneq aalajangiisinnaasut? Nakuusami suliniummi pisortaq Najaaraq Møller tusagassiorfinnut nalunaarutikkut nassuiaavoq.
Akuleruttassapput
– Suliniutikkut matumuuna inersimasut kajumissaarniarpavut meeqqat inuusuttullu inuunerannut asannittumik akulerunnissaminnut tunuarsimaaqqunagit. Tassami tamakkua pitsaasumik meeraanissamut sinaakkutassiisuupput. Uagullu inersimasut meeqqat inuusuttullu oqaloqatigissavagut pisinnaatitaaffii kissaataallu suunersut pillugit. Uagut inersimasut pisinnaatitaaffiit malinneqarnissaat isumagissavarput, kisswaatilli tamatigut naammassisinnaanagillu naammassisassanngilagut, taanna oqarpoq.
Pisinnaatitaavunga...
Nakuusa pingaartumik angajoqqaanit tusakulasarsimavoq nalornilertartunik meeqqat ulluinnarni aaqqiagiinngitsoqartillugu qitornamik tunngavilersuut ´tamatumunnga pisinnaatitaavunga´ atoraangassuk. Assersuutigalugu tassaasinnaapput innartarfiit, nerisarnerit, unnukkut qanoq sivisutigisumik aneersinnaanerit il.il. pillugit.
KNR plakatillu
Paasisitsiniut ´Kinami oqass´? Uagut oqass´! qaammammi tullermi takuneqarsinnaavoq KNR TV-mi radiomilu, nunami sumi tamaani plakatitigut quppersakkatigullu. Aasaaneranilu atuanngiffeqarnerup kingorna atuarfinnut tamanut atuartunut sungiusaatit angajoqqaallu oqaloqatigisarnissaannut najoqqutassat nassiussuunneqassapput.