uran pillugu oqallinneq
Naalakkersuisut: Uran pingaarnertut qallorneqalersinnaavoq
Aningaasatigut iluanaarutit pissutigalugit piffissap ingerlanerani uran saniatigut qallorneqarunnaarluni pingaarnertut qallorneqalersinnaasut, Naalakkersuisut nassuiaapput
Aatsitassat pillugit inatsit malillugu aatsitassat assigisaallu saniatigooralugu qallorneqartut pingaarnersut qallorneqalersinnaapput. Tassani uran mininneqanngilaq.
Inuit Ataqatigiit sinnerlugit Inatsisartuni ilaasortaq Naaja Nathanielsen paragraf 37 naapertorlugu Naalakkersuisunut apeqquteqarpoq ilumut uran piffissap ingerlanerani pingaarnertut qallorneqalersinnaanersoq.
- Uran aatsitassat allat peqatigalugit qallorneqartillugu niuernermi akit aammalu aatsitassarsiorfimmi qanoq annertutiginera apeqqutaasinnaapput pingaarnertut saniatigooralugulu sorliit qallorneqarnerannut. Taamaammat imaasinnaavoq piffissap ingerlanerani sorliit pingaarnertut saniatigullu qallorneqarnerat allannguuteqartoq, inuussutissarsiornermut aatsitassanullu naalakkersuisoq Jens-Erik Kirkegaard akissummini allappoq.
Taassuma ilanngullugu nassuiarpaa uran pingaarnertut qallorneqalissagaluarpat aatsitassarsiorfiup matunissaa Naalakkersuisut piumasarisinnaanngikkaat aatsitassarsiorfik aatsitassat pillugit inatsit naapertorlugu ammarneqarsimappat.
Naalakkersuisut pilersaaruteqanngillat aatsitassanut inatsisip allanngortinneratigut uran saniatigooralugu taamaallaat qallorneqarsinnaalersinnissaanut.