Naalakkersuisut: Umiatsiaaqqanik qaleralinniarnermut akuersissutnik tunniussisoqartarunnaarpoq
Ullumi novemberip 15-iat 2019 aallarnerfigalugu qaleralinniarlutik aalisartunut nutaanut akuersissutinik tunniussisoqartarunnaarpoq. Tamanna Naalakkersuisut aalajangerpaat.
- Naalakkersuisut ullumi novembarip 15-ianni 2019-imi aalajangerput aqutsiveqarfimmi 47-mi, Upernavimmi angerlarsimaffillit pinnagit, umiatsiaaqqamik aalisarsinnaanermut akuersissutinik nutaanik tunniussisarneq ullumimit unitsinneqassasoq.
Aalisarnermut naalakkersuisoqarfimmit, ullumi novemberip 15-ani 2019-imi, aalisartut piniartullu ulluanni, nalunaarutigineqarpoq.
Taamaasillutik sinerissap qanittuani qaleralinniarlutik aalisarut nutaat akuersissutinik tunineqartarnerat Naalakkersuisunit unitsinneqarpoq. Aalisartunut nutaanut akuersissutinik tunniussisarunnaarneq aprilimi 2022-mut killeqartinneqarpoq. Tassani aalisartut amerlassusaat naliliiffigineqassalluni.
- Ukiuni aggersuni pisuussutinut tunngavigineqartup aalisarsinnaasullu akornanni naapertuuttoqaqqilissappat aalajangerneq naliliiffigeqqinneqarumaarpoq, allassimavoq.
Nalunaarut
Aalisarnermut naalakkersuisoq oktoberip naalernerani tusagassiortunik katersortitsinermini nalunaaruteqarpoq, aalisartut nutaat akuersissutinik tunineqartarnissaat killilersorneqalissasoq. Ilanngullugu killeqanngitsumik aalisarfiit atorunnaassasut, nunalu tamakkerlugu aalisarfiit katillugit arfineq-pingasunik aqutsiveqalernissaat, Jens Immanuelsenip sulissutigissallugu nalunaarutigaa.
Taama nalunaartoqarpoq Grønlandsbankenip aalisartunut aningaasaliisarnini tamaasa unitsereeraalu. Aningaasaliiumajunnaarnermut tunngavilersuutigineqarpoq aalisarneq piujuaannartitsinissamut aningaasaqarnikkullu tunngatillugu napatinneqarsinnaanngitsumik ingerlammat. Kingornali Grønlandsbanken nalunaarpoq aalisartut akiliisinnaassuseqarluartut suli aningaasaliiffigineqartarsinnaasut.
Siunnersuineq pisassiisarnerlu
Aqutsiveqarfinni Qeqertarsuup Tunuani Uummannamilu umiatsiaaqqamik aalisarsinnaanermut akuersissutit tunniunneqartartut amerliartupiloorsimapput, taamaattoq ilisimatuussutsikkut 2013-mit 2019-imut siunnersuisarnerit 20 procentinik ikileriarsimallutik.
- Aqutsiveqarfik Qeqertarsuup Tunuani umiatsiaaqqamik aalisarsinnaanermut akuersissutit 2013-imit 2018-imut 188-init 297-inut amerlipput, 58 procentinik amerleriarlutik. Aqutsiveqarfik Uummannami piffissami tassani 227-nit 301-inut amerleriarsimapput, 33 procent amerleriaataalluni , tusagassiutinut nalunaarummi allassimavoq.
Taakku saniatigut qaleralik pisarineqarluartarpoq, millingaluttuinnarlunili. Biologit siunnersuinerat malinnagu ukiut tamaasa annertunerusumik pisassiisoqartarpoq. Qalerallillu pisarineqartussat nungussimatillugit pisasseeqqittoqartarluni.