Naalakkersuisut: Tunumi qilalukkanik qernertanik immikkut pisassiisoqassanngilaq
Tasiilami immikkut qilalugartassiinissamut qinnuteqaat Naalakkersuisunit akuerineqanngilaq
Tunumi qilalukkanut qernertanut pisassat qaffanneqassanngitsut, Piniarnermut Naalakkersuisoqarfik ippassaq aalajangerpoq. Naalakkersuisoqarfik tusagassiutinut nalunaaruteqarluni taama allappoq. Naalakkersuisut siusinnerusukkut nalunaaruteqareerput Tunumi ukioq manna qilalukkanik qernertanik pisassiissutinik qaffaasoqassanatik, tamannalu maanna malinneqarpoq.
Kalaallit Nunaata avannaata kitaani qilalukkanik qernertanik immikkut pisassiisoqareernerata kingorna, Tunumi, pingaartumik Tasiilami piniartut sumiiffimmi qilalugartassanik qaffaasoqarnissaanik qinnuteqarput.
Malittarisassat uniorneqarput
Naalakkersuisoqatigiit isumaqatigiissutaat malillugu piniakkanik atuineq piujuaannartitsinermik tunngaveqarluni ingerlanneqassasoq, Piniarnermut Naalakkersuisoqarfimmi itigartitsissummini tunngavilersuilluni allappoq.
Sumiiffimmilu pisarineqartut nalunaarutigineqartarnissaannut malittarisassat malinneqarneq ajortut, Naalakkersuisoqarfik aamma isumaqarpoq.
- Naalakkersuisoqarfimmit maluginiarneqarpoq piniakkat killilersukkat aqunneqarneri nalunaarut atuuttoq naapertornagu ingerlanneqartanngitsoq. Soorlu assersuutigalugu pisarisuukkat nalunaarutigineqassanatik, aammalu piniarneq pereersoq aatsaat qilalugarniarsinnaanermut akuersissutit aaneqartarsimallutik. Nalunaarummi atuuttumi allassimavoq pisarisuukkat nalunaarutigineqartussaasut aammalu pisassiissutit akuersissutillu piniartunut agguaanneqartassasut qilalugarniartoqartinnagu. Pisaasimasut eqqortumik aqunneqarnissaat eqqarsaatigalugu, Naalakkersuisoqarfik allappoq.
Atlantikup Avannaani Imarmiut Miluumasut pillugit Ataatsimiititaliamit (NAMMCO) Tunumi qilalukkat qernertaqatigiit pillugit paasissutissat nutaat tiguneqarnikut innersuutigineqarput, tassani qilalukkat qernertat amerlassusaat, qilalugaqatigiillu katitigaanerat pillugu paasissutissat nutaat pisassiissutit pillugit mianersornissaq inassutigineqartoq, Naalakkersuisoqarfik naggasiullugu allappoq.