Naalakkersuisut: Taarsiinissamut akisussaaffiliissoqanngilaq

Kuannersuarni aatsitassarsiornissaq politikerinit innuttaasuniillu aalassassutaavoq. Tamanna pissutigalugu Inatsisartunut qinersisoqarnissaa aalajangiisuusoq oqartoqarsinnaavoq.

Tamannami pissutaalluni Demokraatit Naalakkersuisooqatigiinnit tunuarput, Siumumi apeqqut pillugu aaqqiagiinngittoqarpoq, taamaasilluni Siumumi siulittaasoq Erik Jensen Naalakkersuisooqatigiinnik pilersitsiniaraluarnera iluatsinngitsoorluni.

Inatsisartunut qinersisoqartussanngornerata pissutigisaanik ilumut Kuannersuarni aatsitassarsiortoqalissanersoq qularnarsivoq. Innuttaasunik isumasiuititsinermi kingullermi erserpoq, qinersinermi IA qinigaanerpaassasoq. Partii Kuannersuarmut suliniummut akerliusoq ilisimaneqarpoq.

Taarsiinissamik akisussaaffiliissoqanngilaq

IA qinersereernerup kingorna siuttunngussagaluarpat Kuannersuarni uranitalinnik piiaanissaq unitsinneqarnissaa naatsorsuutaavoq. Greenland Minerals Avatangiisinut Sunniutinik Naliliinera aamma inuiaqatigiinni piujuartitsineq pillugu nalilersuinermik nalunaarusiaasa tusarniutigineqarsinnaanerannik akuerineqarsimavoq.

Ilisimatusarfimmi Inatsisilerinermut Immikkoortortaqarfimmi pisortap Anders Jørgensenip pineqartoq toqqaannaq oqaatigisinnaanngilaa, taarsiinissamulli piumasaqarsinnaaneq taamaallaat oqaatigisinnaallugu.

- Pisortat ingerlataat, tassa uani pineqartumi Aatsitassanut Naalakkersuisoqarfik, taarsiinissamut piumasaqarfigineqarsinnaavoq, tamannali aatsaat pisinnaavoq suliffeqarfimmik isumaqatigiissutaasut atuutinngikkunigit, Sermitsiaq.AG-mut oqarpoq.

- Taamaattoq suliffeqarfimmik isumaqatigiissutaasut sunnersut apeqqutaapput, oqarpoq.

Apeqqutigineqaqattaarpoq

Greenland Minerals Kuannersuarni piiaanissamut 100 million koruunit qaangerlugit aningaasaleereerpoq. Suliaq unitsiinnassaneraat piffissap takutikkumaarpaa.

2013-mi apeqquserneqartalerpoq suliniut unitsiinnarneqassappat Greenland Minerals taarsiiffigitinnissamut piumasaqarsinnaanersoq. Tamannali Naalakkersuisuusartunit ilumuunnginnerarneqartarpoq.

Greenland Mineralsip tusarniaatitsinerani suliffeqarfiup pisortaa John Mair aperineqarpoq, suliffeqarfik taarsiiffigitinnissamut suliniuteqassanersoq, aatsitassarsiorfik taamaatiinnarneqassappat. Apeqqutigineqartoq toqqaannartumik akinngilaa.

Akissutit sisamat assigiit

Namminersorlutik Oqartussat taarsiiffigitinnissamik piumasaqarfigineqarsinnaanersoq 2013-imit Naalakkersuisuusunut sisamariarluni aperisoqartareerpoq, tamarmillu akissutit assigiittarput. Vittus Qujaukitsoq aatsitassarsiornermut naalakkersuisutut 2018-mi kingullermik akissuteqartuuvoq. 2019-mi Erik Jensen apeqqutigineqartumut akissuteqartuulluni. Akissutaat taakku assigiipput. Ima akissuteqarput:

Pisinnaatitsissummik pigisaqartoq pinngoqqaatinik qinngornermik ulorianartunik akulinnik piiaanissamut akuersissummik tunineqarnissamik qinnuteqarpat, Naalakkersuisut qinnuteqaat nammineerlutik aammalu arlaannik tunngaveqanngitsumik imaluunniit sumilluunniit tunngaveqanngitsumik itigartissinnaavaat. Qinnuteqaat ilaatigut politikkikkut imaluunniit ingerlatsivimmi pinngoqqaatinik qinngornermik ulorianartunik akulinnik piiaanissamut akuersissummik tunniussisannginnissamik aalajangiineq tunngavigalugu itigartinneqarsinnaavoq. Qinnuteqaammik itigartitsineq pisussaaffeqarnermik akisussaaffeqarnermillu malitseqassanngilaq, ilanngullugit Namminersorlutik Oqartussanut, Naalakkersuisunut imaluunniit Aatsitassanut Ikummatissanullu Pisortaqarfimmut taarsiinissamik akisussaaffiliissanani.

Tassa Greenland Minerals taarsiiffigitinnissamik piumasaqassagaluarpat itigartitsisinnaanermik pisinnaatinneqarput.