Naalakkersuisut: Puisit amiinut akit aalajangerneqarput

Naalakkersuisut KNAPK aamma Great Greenland puisit amiisa tunineqarnissaannut 2019-imi akinik aalajangersaallutik isumaqatigiissusiorput.

Inuussutissarsiornermut nukissiuuteqarnermullu naalakkersuisoqarfik tusagassiutinut nalunaarummini taama ilisimatitsivoq.

Puisit amiisa akii 2019-imi ima inissipput:

• Natsiit 70 cm inorlugit angissusillit : 275 kr.
• Natsiit 70 cm angullugit angissusillit: 300 kr.
• Aataat: 400 kr

Akit aalajangersimasut

Inuussutissarsiornermut nukissiuuteqarnermullu naalakkersuisoqarfik tusagassiutinut nalunaarummini ilisimatitsivoq, Siorna akinut atorneqartoq, tunisinermi akit ammit tunisat amerlassusaat malillugit qaffakkiartortitaanerinut atornagu, maanna ammit suussusaannut ataasiakkaanut akigititamut aalajangersimasumut tunisinermi tapiissutit aalajangernerinik isumaqatigiissut nassataqartoq.

- Tunisinermi akigititanik qaffasinnerusunik isumaqatigiissut nutaaq aqqutigalugu qularnaarisimanerput assut iluarisimaarpara. Tamatuminnga tunngaveqarluta Great Greenland A/S amernik amerlanernik pissarsisinnaassasoq neriuutigaara, taamaalillutalu ukiumi takkuttussami niuernikkut angusanik pitsaasunik suliffeqarfik qularnaarsinnaallutigu neriuutigaara, Inuussutissarsiornermut Nukissiuuteqarnermullu Naalakkersuisoq, Aqqalu Jerimiassen (A) oqarpoq.

Isumaqatigiissut iluarisimaarneqarpoq

KNAPK-p siulittaasuata, Henrik Sandgreenip Great Greenlandillu siulersuisuisa isumaqatigiissutigineqartoq aamma iluarisimaarpaat.

- Ilaasortatsinnut tunisinermi akit qaffasinnerusut pillugit KNAPK-p kissaatigisaata akuerineqarsimanera assut iluarisimaarpara. Amernik amerlanernik tunisinissamut akigititat qaffasinnerusut tunngaviussapput, Henrik Sandgreen tusagassiutinut nalunaarummi oqarpoq.

- Great Greenland A/S-imiit isumaqatigiissut iluarisimaarparput, maannakkummi takuarput puisit amii piumaneqartorujussuusut. Neriuppugullu piniartut puisit amiinik pisariaqartitatsinnik tunisilluarumaartut. Taamaattumik tunitsivinnik amerlanernik ammaassaagut akillu qaffaavigivagut. Taamatullu nunat tamalaat akornanni, kalaallit piniariaasiat piujuartitsineq aallaavigalugu ingerlanneqartoq paasititsiniutigalugu nangittumik siammartissavarput, Great Greenland A/S-imi siulersuisuni siulittaasoq, Juliane Henningsen oqarpoq.

Qaammatit sisamat qaangiuppata nalilersuisoqassaaq

Isumaqatigiissut isumaqatigiittunit iluarisimaarneqaraluartoq, qaammatini sisamani puisit amiinik tunisisoqartareerpat, isumaqatigiissummi puisit amiinut akigitinneqartut nalilersorneqassasut, tusagassiutinut ilanngullugu nalunaarutigineqarpoq.

Naalakkersuisut, KNAPK aamma Great Greenland isumaqatigiissummik maajip aallaqqaataani 2019-imi nalilersuissapput.