Naalakkersuisut: Poorskikkunni imaaliorsinnaavutit
Påskep nalaani sulinngiffeqarfissanngorluinnarpoq, sulinngiffeqarnerullu nalaani ilaquttat peqatiginissaat arlalinnit qilanaarineqassannguatsiarpoq. Taamaasiortoqarsinnaavali? Påskep nalaani pissuserineqarsinnaasut pillugit Naalakkersuisut innersuussuteqarput.
Naalakkersuisut Facebookimi quppersakkaminni påskep sapaataanut tunngassuteqartut apeqqutit arlallit akivaat.
Apeqqutit akissutillu ilaat uani tigulaariffigaagut.
Assersuutigalugu påskemi immikkoorluta nerersuaaqatigiinnissaq inassutigineqarpoq.
- Poorskimi nerersuaaqatigiittarneq amerlasuunut ileqqutsialaavoq, tassanimi ilaquttavut ikinngutivullu naapittarpavut, ukiorli manna pisarneq malillugu poorskimi nerersuaaqatigiinnissaq inassutiginngilarput. Paarlattuanik qarasaasiaq atorlugu poorskimi nerersuaaqatigiittoqarsinnaassaaq, tamannami aqqutigalugu immikkoorlusi nerisinnaassaasi, videolu atorlugu immissinnut oqaluussinnaassaasi nuannaaqatigiillusilu.
Paarlattuanik allakkamik nuannaalersitsisussamik nassiussisinnaavutit, ilaquttannut sianersinnaassaatit imaluunniit poorskimi nerersuaaqatigiinnissap kinguartinnissaa pillugu isumaqatigiissinnaassaasi. Nappaatip sapinngisamik tuniluutilinnginnissaanut tamattaalluta iliuuseqarsinnaavugut, allassimavoq.
Ilanngullugu sukannersumik innersuussutigineqarpoq ilaquttat qaangerneqarsinnaanngitsumik nappaateqartut 65-illuunniit sinnerlugit ukiullit pulaarneqassanngitsut. Inuiaqatigiinni eqimattat taakku covid-19-imik napparsimalissagunik peruluutigisinnaavaat.
Pinnguaqatigiinnerit pisuttuarnerillu
Meeqqat pinnguaqatigisartakkatik maqaasippatigit, meeqqanik allanik amerlanngitsunik pinnguaqateqarsinnaapput. Pinnguaqatigisartakkat taakkuinnaanissaat innersuussutigineqarpoq.
Napparsimanngikkaanni, eqqiluisaaraanni allanullu qanillinaveersaarsinnaagaanni, upernarnerani aamma silaannarissarluni aneertoqarsinnaavoq.