Skip to main content

Naalakkersuisut: Plastikkit ataasiaannarluni atugassat inerteqqutaalissapput

Plastikkit eqqakkallu illoqarfiit nunaqarfiillu imartaanniittut katersorneqakkajuttarput, pinngortitamut siaruaassinnaammata. Naalakkersuisut taamaammat plastikkinik atuisarneq annikillisarniarpaat. Plastikkit ataasiaannarluni atugassat 2023-miit inerteqqutaalissapput.

Naalakkersuisut pilersaarut, aalajangersimasunik suliniuteqarnikkut plastikkinik atuinermik annikillisaaffiusussaq aammalu eqqakkanik plastikkinik suliaqarnerup pitsaanerulernissaanik qulakkeeriffiusussaq akuersissutigisimavaat.

LÆS OGSÅ: Plastikkit immamut eqqakkat Nunatsinni ajornartorsiutaapput

- Plastikkit mingutsitsineri avatangiisinut peqqissutsitsinnullu sunniuteqarnerluttarput. Plastikkit pinngortitamut qimaannarneqaraangamik sequnninnguullutik uumasunut nerisarisatsinnut tuttarput. Suliniutinik, plastikkit annikinnerusut pinngortitamut pisarnissaannik kinguneqartussanik ingerlatsiniarpugut, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Plastikkinik atuisarneq ukiut ingerlarneranni nunarsuarmi tamarmik ukkatarineqarneruleriartorsimavoq. Ilaatigut nunarsuarmi tamarmi imermi imigassami plastikkeeqqat isaannarmik takuneqarsinnaanngitsut nassaarineqartarput.

Suliniuteqarnissamut pilersaarut ilaatigut Naalakkersuisut kingusinnerpaamik 2023-mi plastikkinut ataasiaannarluni atugassanut inerteqquteqarnermik atuutsitsilerniarnerannut nalunaarummik imaqarpoq.

- Akisussaaqataaniarlutik iliuuseqartartut, aammalu plastikkinik ataasiaannarluni atugassanik atuiniaratik aaqqiissutissanik allanik toqqaasartut amerliartornerat misigalugu nuannerpoq. Inuit amerlasuut ataatsimoorluta saliisarnitsinnut ikiuuttartut aammalu pinngortitamik paarsilluarniarlutik tunniusimasut takusarparput. Suliniuteqarnissamut pilersaarusiap suliarineqarnerani innuttaasunit inuussutissarsiortunillu siunnersuutinik pitsaasunik takkuttoqarpoq, tamannalu nuannaarutigilluinnarparput. Ataatsimoorluta iliuuseqaraangatta angusassat pitsaanerpaat angusinnaasarpagut, Naalakkersuisoq Kalistat Lund oqarpoq.

Anartarfiit puussiartaannik atuisarneq misissorneqassasoq

Sineriammi tamarmi anartarfiit puussiartaat suli atorneqartarput. Naalakkersuisut taamaammat anartarfiit puussiartaannik atuinernut taartissanik misissuiniarput.

- Aamma Naalakkersuisut plastikkinik atuinermik annikillisaaniarlutik suliniutinik allanik arlalinnik ingerlatsiniarput. Naalakkersuisut ilaatigut maanna anartarfiit puussiartaannik atuinernut taartissanik misissuiniarput, arsartarfinnit ivigaaqqanik qallikkanit plastikkit sequnnerinik mingutsitsinermik killilersuiniarlutik misiliiniarput aammalu aalisarnermik inuussutissarsiuteqarnermi atortut plastikkiusut eqqortumik iginneqartarnissaannut periarfissanik pitsannguiniarput, Naalakkersuisut tusagassiorfinnut nalunaaruteqarlutik allapput.

Naalakkersuisut plastikkinut tunngatillugu suliniutissatut pilersaarutaa uani takuuk.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER